O Conservatorio Profesional de Música oferta para o próximo curso 34 prazas
O Conservatorio Profesional de Música de Vilagarcía ven de abrir o prazo de inscrición nas probas de acceso para as persoas que desexen formarse no centro o vindeiro curso escolar. O número de prazas que se ofertan para a temporada 2013/14 nun total de 10 especialidades instrumentais ascende a 34, das cales 15 corresponden ao Grao Elemental e as 19 restantes ao Profesional. O prazo de matriculación nas probas de acceso ábrese o 23 de maio.
Para ingresar por vez primeira no Conservatorio, os interesados deberán superar unhas probas de acceso a través das cales se determina o nivel do aspirante e que, de superarse con éxito, serven para adscribir aos alumnos ao curso que lle corresponde dentro de cada Grao.
O centro dispón para o vindeiro curso de 15 vacantes no Grao Elemental en un total de 8 especialidades. Son clarinete (2), guitarra (2), frauta (2), piano (3), saxofón (1), trombón (1), trompeta (2) e violín (2). No caso das 19 prazas ofertadas no Grao Profesional, a dispoñibilidade afecta a 10 instrumentos. Son clarinete (1), guitarra (1), frauta (4), piano (3), saxofón (1), trombón (1),trompa (1), trompeta (2), violín (2) e violonchelo (3).
As persoas interesadas en realizar as probas de acceso deberán matricularse previamente para o cal dispoñen dun prazo que vai do 23 ao 31 de maio. O trámite deberá realizarse nas dependencias do centro, emprazado no primeiro andar do Auditorio Municipal, en horario de 10 a 13:30 horas pola mañá e de 16 a 20 horas pola tarde. As probas de acceso, tanto para o Grao Elemental como para o Profesional realizaranse a partir do 17 de xuño.
Os criterios de avaliación e a metodoloxía das probas de acceso, calendario de exames e publicación de listas pódense consultar na web do Conservatorio, á que se accede a través do portal municipal www.vilagarcia.es.
O prazo de matriculación para os alumnos que xa cursan estudos no centro abrirase a mediados de xuño.