O Concello de Cedeira promove GalEco, unha galería aberta ás Enerxías Renovables

Cedeira será sede da primeira edición de GalEco, unha Galería aberta ao mundo da Ecoloxía e, máis concretamente, ás Enerxías Renovables. Organizada polo Concello, celebrarase o sábado 8 e o domingo 9 de xuño na vila. A Avenida de a Mariña, no tramo que discorre entre as pontes vella e nova, albergará a cita en horario de mañá (de 11 a 14 horas) e de tarde (de 16 a 20 horas). Neste sentido, o concelleiro de Desenvolvemento Local, Luis Rubido, explica que a feira nace cun obxectivo moi claro: fomentar o uso de enerxías renovables a nivel doméstico, dando a coñecer os sistemas que veciños e veciñas teñen o seu alcance, explicando o seu funcionamento e informando dos seus beneficios, tanto de carácter ambiental como económico. Para iso, firmas comerciais especializadas mostrarán ao público todo tipo de produtos, dende placas solares para abastecer de enerxía a vivenda ata cociñas e caldeiras de biomasa. O catálogo completarase con talleres prácticos, aglutinados en torno ao que se denominou a Feira do Sol, onde os asistentes poderán comprobar in situ o seu funcionamento.
Outro dos puntos fortes de GalEco será a tecnoloxía smart, enfocada a particulares e administracións públicas. A firma Grupo Austen, especializada en wireless sensor networks, dará a coñecer Sega System e SiLamp, dúas ferramentas de eficiencia enerxética con múltiples aplicacións no campo da agricultura, a iluminación pública ou a xestión de residuos. Unha tecnoloxía que funciona con éxito na smartcity de Santander. E unhas ferramentas con selo ferrolano que permiten xestionar a través do móbil ou o ordenador dende o control do rego en cultivos ou xardíns ata o arranque e apagamento programado dos puntos de luz.

Neste contexto, Luis Rubido asegura que GalEco nace con vocación de continuidade e con ganas de reeditar a cita en próximos anos, ampliando e mellorando a súa oferta. E é que GalEco nace do compromiso do goberno local coas enerxías renovables. Compromiso que acompañou a xestión municipal. Así, as actuacións máis recentes nesta materia permitiron levar a cabo a instalación de paneis solares no pavillón polideportivo municipal para a produción de auga quente para a piscina climatizada ou a substitución da caldeira de gasóleo
por unha de biomasa na escola infantil municipal, así como a paulatina renovación das luminarias por outras de baixo consumo.
Con esta Galería aberta ás enerxías renovables, o goberno local de Cedeira dá un paso adiante e, á par que traballa porque a Administración sexa un exemplo nesta materia, busca a implicación dos veciños para lograr que o uso de sistemas de eficiencia enerxética se converta
nunha realidade. Con vantaxes para o medio, pero tamén para a economía doméstica, posto que o investimento inicial, co prezo das fontes de enerxía tradicionais en continua suba, lógrase amortizar nun período de tempo máis que razoable.