Mañá remata o prazo de matriculación nas probas para acceder ao conservatorio no curso 2013/14

O Conservatorio Profesional de Música de Vilagarcía lembra que mañá, venres, 31 de maio, remata o prazo de matriculación nas probas para acceder o vindeiro curso ás ensinanzas musicais que se imparten no centro. Os interesados en optar a algunha das 34 prazas dispoñibles en10 especialidades instrumentais poden realizar o trámite nas oficinas do centro (sitas no Auditorio) en horario de 10 a 13:30 horas pola mañá e de 16 a 20 horas pola tarde.

Como se sabe, para ingresar por vez primeira no Conservatorio, os interesados deberán superar unhas probas de acceso a través das cales se determina o nivel do aspirante e que, de superarse con éxito, serven para adscribir aos alumnos ao curso que lle corresponde dentro de cada Grao. As probas de acceso, tanto para o Grao Elemental como para o Profesional realizaranse a partir do 17 de xuño.

Os criterios de avaliación e a metodoloxía das probas de acceso, calendario de exames e publicación de listas pódense consultar na web do Conservatorio, á que se accede a través do portal municipal www.vilagarcia.es.

O centro dispón para o vindeiro curso de 15 vacantes no Grao Elemental en un total de 8 especialidades. Son clarinete (2), guitarra (2), frauta (2), piano (3), saxofón (1), trombón (1), trompeta (2) e violín (2). No caso das 19 prazas ofertadas no Grao Profesional, a dispoñibilidade afecta a 10 instrumentos. Son clarinete (1), guitarra (1), frauta (4), piano (3), saxofón (1), trombón (1),trompa (1), trompeta (2), violín (2) e violoncello (3).