Lete Lasa subliña a importancia de prover ao deporte galego de profesionais do dereito

Acto inaugural do Curso de Dereito Deportivo do Fútbol

O secretario xeral para o Deporte, José Ramón Lete Lasa, subliñou hoxe a importancia de prover ao deporte galego de profesionais do Dereito especializados e permanentemente actualizados. “O noso fútbol, o noso deporte, require de actividade, de éxitos competitivos e de gradas ateigadas de afeccionados, mais require tamén de sólidos profesionais cuxos coñecementos son absolutamente necesarios para desenvolver o seu traballo de maneira fiable e actualizada”, remarcou.

Resaltou que desde a intervención das distintas administracións ata a regulamentación da competición pasando pola resolución de conflitos, o dereito deportivo require “dunha especialización e sólida formación”.

Lete Lasa, quen hoxe inaugurou o Curso de Dereito Deportivo do Fútbol en Santiago, puxo o acento na complexidade do ordeamento xurídico deportivo, no que existe unha normativa estatal e outra autonómica, ademais da propia regulamentación federativa, e insistiu na necesidade “dun intenso labor, un labor tamén continuo, de estudo e perfeccionamento teórico e práctico”.

A ese respecto, o secretario xeral para o Deporte felicitouse pola posta en marcha deste curso, iniciativa da Federación Galega de Fútbol, e da que resaltou o seu “acerto e oportunidade”, así como o seu deseño e, sobre todo, “polo seu profesorado, rigorosamente conformado por profesionais de recoñecido prestixio”.