Igualdade informa das estadías de tempo libre para mulleres soas con fillos menores

A Área de Igualdade do Concello de Vilagarcía informa que, a Secretaria Xeral de Igualdade da Xunta de Galicia, ven de convocar as axudas para estadías de tempo libre para mulleres soas con responsabilidades familiares non compartidas. A finalidade destas axudas é facilitarlles ás mulleres soas, con fillos/as menores que estean exclusivamente ao seu cargo, un espazo e un tempo no cal poidan intercambiar experiencias a través da convivencia nun espazo de lecer.

As estadías terán unha duración de entre sete e dez días, en réxime de pensión completa, e desenvolveranse preferentemente entre finais do mes de xuño e principios do mes de setembro.

As mulleres que queiran facer estas solicitudes deberán reunir os seguintes requisitos:

– Ter fillas/os en idades comprendidas entre os 2 e os 12 anos.
– Estar domiciliadas na Comunidade Autónoma, e no caso de mulleres estranxeiras ter permiso de residencia ou tarxeta de réxime comunitario.
– Que todos os ingresos da unidade familiar non superen o salário mínimo interprofesional (SMI), per cápita.
– Non padecer nin elas nin os fillos/as enfermidade que impida a normal convivencia.

A asistencia ao programa das mulleres que resulten beneficiadas deberá ser na compaña dos seus fillo/as menores. O prazo de solicitude é ata o vindeiro 30 de maio. Para maior información e solicitude, as interesadas poden dirixirse á Área de Igualdade do Concello.