Flores destaca que os datos da primeira Vía Prioritaria Vixiada confirman que é posible compaxinar os diferentes modos de transporte

O Tenente de Alcalde de Seguridade e Mobilidade, Julio Flores, informou do balance do primeiro ano da primeira Vía Prioritaria Vixiada (VPV) que discorre entre Federico Tapia e San Andrés, e que comezou funcionar a plena operatividade en marzo de 2012. “Cumpríronse os obxectivos da primeira Vía Prioritaria Vixiada, que será o punto de partida da Rede Urbana Eficiente” sinalou, e continuou “é posible compaxinar os diferentes sistemas de transporte grazas a este novo modelo de xestión de tráfico, onde se adaptou o aparcadoiro en superficie a cada zona por onde discorre o trazado, incluíndo a creación de zonas de aparcadoiro express; onde se cambiou un carril bus físico por unha plataforma dixital de prioridade bus e onde a aplicación das novas tecnoloxías garantiu a fluidez do tráfico e esta logrando paulatinamente desterrar a eiva da dobre fila”.

Flores recordou que o anterior carril bus segregado se substituíu dende a rúa Federico Tapia ata a rúa San Juan pola primeira Vía Prioritaria Vixiada, un novo concepto de mobilidade que conta co sistema de prioridade bus ao longo de todo o traxecto para manter as frecuencias do bus urbano, a videodetección para evitar a dobre fila e unha reordenación do aparcadoiro en superficie. “Con esta reordenación logramos incrementar 244 novas prazas de aparcadoiro de diversa tipoloxía en todo o trazado -case o triplo das existentes ata entón- incluídas as novas prazas de aparcadoiro express, así como o incremento das prazas de carga e descarga, novas prazas para discapacitados e a creación de prazas de aparcadoiro para motos”, recordou.

Flores destacou que, tras analizar os datos do seu primeiro ano de funcionamento, se observa que 9 de cada 10 buses urbanos non necesitaron activar o sistema de prioridade bus ao cumprir as frecuencias previstas. “Este sistema detecta a situación do bus urbano e transmítea ao sistema semafórico, que facilita automaticamente o paso daqueles buses que leven atraso para manter as frecuencias de cada liña que circula ao longo do traxecto” indicou.

Por outro lado, a recadación total do servizo de ORA nas prazas de aparcadoiro da primeira VPV aumentou en case un 15%, grazas ás prazas de aparcadoiro recuperadas e ás novas prazas de aparcadoiro express. “Este incremento de recadación axuda a compensar o déficit histórico deste servizo e débese, en boa parte, a que a porcentaxe media de rotación das prazas de aparcadoiro express é do 65%, alcanzando na rúa Rosalía de Castro case o 80% ou superando o 70% na zona da Praza de Vigo, cando a media de rotación as prazas de ORA normal é dun 40% na cidade”, sinalou Flores.

O sistema de videodetección para o control de estacionamentos indebidos supuxo 4.062 denuncias automáticas, que foron validadas por axentes da Policía Local na Sala de Tráfico. “Con este sistema tecnolóxico se esta logrando o cumprimento gradual das normas de circulación. A media entre abril e xullo de 2012, os primeiros meses, foi de 476 multas mensuais e a media entre xullo e febreiro de 2013, de 258, un 46% menos. É dicir, pasamos dunha media de 15 denuncias diarias a unha media de 8 denuncias diarias e o obxectivo é seguir reducindo ao mínimo as sancións, a medida que os condutores se vaian concienciado da importancia de estacionar correctamente os seus vehículos para facilitar a mobilidade de todos” indicou, e engadiu “por tramos, onde máis denuncias se realizaron son en Praza de Galicia (40%) e Praza de Vigo (30%), aínda que hai que precisar que no tramo da Praza de Galicia se pasou de 241 denuncias mensuais de media a 87 denuncias mensuais de media”, puntualizou.

Polo tanto, os datos da VPV dende a súa entrada en funcionamento a plena operatividade demostran que se cumpren as frecuencias do transporte público, que os cidadáns aproveitan o incrementado das prazas de aparcadoiro, que o novo sistema de aparcadoiro express facilita aparcadoiro regulado aos vehículos que ata agora estacionaban en dobre fila e que as novas tecnoloxías serven para garantir a fluidez de tráfico. “Polo tanto, continuaremos coa implantación da Rede Urbana Eficiente nas vías da cidade que o Plan de Mobilidade Urbana Sostible identifique como prioritarias”, finalizou Flores.