Comeza en San Sadurniño a campaña primavera-verán de limpeza de pistas

A Concellería de Urbanismo, Obras e Servizos vai poñer en marcha o seu plan de traballo para a limpeza das pistas e estradas de competencia municipal. A campaña comeza este mes empezando pola parroquia de Lamas, aínda que o desenvolvemento do plan dependerá de como estea o tempo. Desde o Concello pídese a colaboración veciñal para que os traballos se poidan levar a cabo dunha forma máis doada.

De acordo coa normativa urbanística autonómica as plantacións forestais deben afastarse das estradas ou camiños un mínimo de dous metros. Ademais, os peches con arame ou sebe teñen que manter unha distancia mínima de 4-5 metros -dependendo do tipo de vía- con respecto ao eixe do camiño. Cómpre ter en conta que os arames, postes e outros elementos empregados nos peches poden danar a maquinaria municipal.

Consonte a lei autonómica, tamén hai que lembrar a obrigatoriedade de manter limpas as parcelas urbanas ou en proximidades a vivendas. Igualmente, debido a varias queixas recibidas no Concello por parte das empresas de transporte escolar, faise un chamamento a que as persoas propietarias de árbores que dean contra as estradas eliminen aquelas pólas que invadan a zona de influencia das vías para non causar danos nos vehículos.