A visita guiada de mañá ao cemiterio de San Amaro dedícase aos escritores galegos

Con motivo da celebración do Día das Letras Galegas, o Consorcio de Turismo, que preside Luisa Cid, decidiu dedicar a visita guiada de mañá, sábado 18 de maio, ao cemiterio de San Amaro aos escritores galegos que tiveron unha relevancia especial. Así, a visita, que se realizará a partir das 16.00 horas, terá un contido puramente literario e na que os participantes farán un percorrido polas tumbas dos escritores máis ilustres.

Durante esta visita de hora e media repasarase a obra e contexto de tres figuras claves no Rexurdimento, como Eduardo Pondal, Curros Enríquez e Manuel Murguía, ademais das poetisas Clara Curral, Francisca Herrera e Elisa Lestage, os irmáns Vilar ponte, Wenceslao Fernández Flórez, Manuel Lugrís, Eladio Rodríguez, Galo Salinas, Evaristo Martelo e Francisco de la Iglesia.

Esta ruta forma parte do programa de visitas guiadas posto en marcha no mes de marzo polo Consorcio de Turismo dirixido a cidadáns e visitantes, no que se inclúen tamén outros catro percorridos, como a visita nocturna á Cidade Vella; Catuxa, dirixida ao público infantil; o parque escultórico da Torre e Sir John Moore. Todas as visitas son gratuítas e teñen unha duración aproximada de dúas horas e, dependendo do grupo, realízanse en galego, castelán ou inglés. A reserva de prazas pódese realizar a través do teléfono 981 923 093.