A Policía Local da Coruña controla un total de 385 motocicletas na campaña especial desenvolvida a principios de mes

O departamento municipal de Mobilidade e Seguridade Cidadá, a través da Policía Local, controlou un total de 385 motocicletas durante a campaña especial sobre control de motocicletas da Dirección Xeral de Tráfico que se desenvolveu entre o 29 de abril e o 5 de maio.

Neste período rexistráronse 12 denuncias aos usuarios de 9 motocicletas, das que 4 foron por temas relacionados coa ITV; 2 por carecer de seguro; 1 por exceso de velocidade; outra por non utilizar casco; e 4 máis por outras cuestións. Hai que destacar que das 385 motocicletas controladas non se rexistrou ningunha incidencia relativa a alcohol e drogas nin a asuntos relacionados coa placa da matrícula; dous dos temas nos que incidía a campaña.

O obxectivo era a vixilancia e control de motocicletas para axudar a reducir o número de feridos e falecidos en accidentes de circulación, tendo en conta que na última década o parque de motocicletas se incrementou en España nun 94% e que, xunto cos ciclomotores, representan o 16% do parque automóbil nacional.