A Fundación de Deportes reparte entre 26 clubs os 81.000 euros para o fomento do deporte federado

O Consello Reitor da Fundación Municipal de Deportes acaba de resolver a convocatoria das subvencións para o fomento do deporte local. Un total de 26 clubs benefícianse este ano das axudas ás cales a Fundación destinou 81.000 euros. O reparto realizouse en base á puntuación acadada por cada club en función aos criterios establecidos nas bases da convocatoria. Tan só dúas entidades quedaron fóra da convocatoria por incumprimento dalgúns dos requisitos das bases.

As subvencións para o Fomento do Deporte Federado pretenden servir para promocionar a actividade dos clubs e entidades deportivas locais de carácter federado contribuíndo ao financiamento dos gastos correntes derivados da realización das actividades deportivas federadas dos colectivos de base.

Os clubs que este ano acadaron a máxima puntuación e, polo tanto, as subvencións de maior importe foron o Club Olimpic e o Arosa S.C., seguidos do BBC e da Agrupación Deportiva Cortegada. O listado coas puntuacións obtidas por cada cantidade e a suma das axudas que percibirán pódense consultar no taboleiro de anuncios da web municipal www.vilagarcia.es.