publicidade hoxe

A Domus celebra un novo foro de debate do proxecto Sea for Society

PUBLICADO EN: Noticias de GaliciaA CoruñaLocal
A-
A+

A Concellaría de Cultura informa de que mañá, mércores 22 de maio, ás 19.30 horas, terá lugar na Domus un novo evento enmarcado dentro dos foros de debate do proxecto europeo Sea for Society, que en España lidera o Aquarium Finisterrae, coa colaboración do Centro Oceanográfico da Coruña.

Nesta ocasión intervirá Ricardo Aguilar, director de investigación de Oceana en Europa. O foro de debate leva por título Lo que el mar nos ofrece. Los servicios ambientales de los océanos. Na súa intervención falará sobre a necesidade de dispoñer de cifras e datos para falar de conservación. Moitos investigadores empezaron a poñer números á importancia dos ecosistemas para a alimentación, a sanidade, os ciclos fundamentais da vida, a loita contra a erosión, o cambio climático e todo aquilo que está unido á propia orixe da crise ou que vai dificultar a saída desta.

Os océanos seguen sendo os grandes descoñecidos, pero as primeiras estimacións están a demostrar que a súa produtividade para as actividades humanas é enorme. Os seus ecosistemas poden producir ata 10 veces máis beneficios que os bosques tropicais; e aínda se está a empezar a comprender todo o que ofrece o mar. O primeiro é a existencia: sen océanos sería imposible a vida sobre a Terra.

Tras a presentación do tema, terá lugar un debate no que desempeñarán un papel esencial os mozos colaboradores, estudantes universitarios seleccionados para participar no proxecto. A entrada a este novo evento de Sea for Society é libre e gratuíta.

21 de maio de 2013 | 17:42 • Sen comentarios

Comentarios pechados.