A Coruña acolle por segundo ano consecutivo a Copa de Europa Júnior de Judo

Presentación da Copa de Europa Júnior de Judo

O concelleiro de Deportes, Francisco Mourelo, acompañado polo presidente da Federación Galega de Judo, Mario Muzas, o vicepresidente, Miguel Ramos, e o director técnico, Juan Carlos Purriños, e o vicepresidente da Deputación, Mariel Padín, presentou esta mañá a Copa de Europa Júnior de Judo -XV Internacional Teresa Herrera que se celebrará no Pazo dos Deportes de Riazor este fin de semana. Así, a nosa cidade converterase os próximos 25 e 26 de maio, na capital europea desta disciplina deportiva. “Non” é “nova a tradición do Judo na Coruña. De feito, o pasado fin de semana a cidade foi a sede do Campionato de España en categorías Infantil e Cadete con máis de 800 mozos participando nunha competición de máximo nivel. Agora, tan só cinco días despois, A Coruña volve ser a capital desta disciplina deportiva reunindo ás promesas deste deporte a nivel europeo”, explicou Mourelo e engadiu: “Temos unha longa tradición na práctica deste deporte como demostra o noso veterano Trofeo Miguelito que acaba de celebrar os seus 25 anos de existencia, polo que temos que dicir que A Coruña é durante un mes o referente do judo nacional e internacional,”.

Así, Mourelo explicou que a competición se desenvolverá en dúas xornadas, sábado e domingo, en oito grupos, segundo o peso, en categoría masculina e noutros tantos en categoría feminina. Os participantes chegarán dende todos os puntos de Europa. En total participan 244 deportistas, 142 homes e 102 mulleres, e 13 federacións nacionais: Portugal, Italia, Alemaña, Gran Bretaña, Canadá, Croacia, Azaerbayán; Kazakstán; República Checa, Eslovenia, Arxentina, Xeorxia e, por suposto, España, coa representación da selección española e de 12 comunidades autónomas. “Teremos a mirada depositada nos 35 galegos que competirán e, por suposto, nos 18 representantes coruñeses”, explicou o concelleiro.

Francisco Mourelo destacou os grandes atractivos da cidade para acoller este tipo de eventos. “É a segunda vez que A Coruña acolle este torneo grazas á profesionalidade e boa organización do torneo Teresa Herrera que fixo que a Unión Europea de Judo apreciase as posibilidades desta cidade para acoller un evento destas características. A Coruña é un lugar perfecto para acoller eventos deportivos de primeiro nivel e ninguén o pasa por alto”, destacou. “Este Goberno municipal -continuou- seguirá traballando nesta liña: inculcando a práctica deportiva, sobre todo entre os máis novos, e fomentando o deporte base”.

Ademais, coincidindo con este torneo, entre os días 27 e 29 de xuño, celebrarase un campo de adestramento voluntario no que este ano participan España, Portugal, Alemaña, Kazakstán, Italia e Eslovenia. “Trátase de dotar os países participantes dun lugar para adestrar entre eles. Trátase dunha práctica moi beneficiosa e que cada vez ten máis aceptación xa que dá aos participantes a oportunidade de adestrar con rivais do seu nivel”, detallou Mourelo quen explico que durante este campus se utiliza en adestramento Randori no que 200 judokas se colocan emparellados nun tatami de grandes dimensións cambiándose de parella cada cinco minutos. “É un combate sen puntuación, pero que permite probar técnicas de derrubamento”, concluíu o concelleiro.

A Copa de Europa Júnior de Judo está organizada pola Federación Galega de Judo e a Real Federación Española de Judo; e patrocinado polo Concello da Coruña, a Secretaría Xeral para ou Deporte e a Deputación da Coruña.