Veciños de Vilatuxe participan nunha charla sobre seguridade impartida polo capitán da Garda Civil

Instante da charla de seguridade

Dentro do ciclo de charlas informativas promovidas pola Concellería de Benestar, en colaboración directa coa Garda Civil, esta tarde tivo lugar no centro social da parroquia de Vilatuxe a segunda destas sesións informativas sobre prevención e mellora da seguridade dirixida principalmente ás persoas maiores, tras a celebrada o venres pasado en Bendoiro.

Antonio Sánchez, capitán da Garda Civil de Lalín, foi o encargado de impartir esta sesión de carácter informativo, a un público conformado por unha vintena de asistentes, ademais da concelleira da área de Vilatuxe, Sara Fernández e de persoal de servizos sociais.

O seguinte destes encontros nos que se orienta ás persoas asistentes sobre medidas de como incrementar a seguridade ante posibles roubos; uso fraudulento das súas propiedades ou das súas contas e cartillas de aforro e nos que se incide sobre a necesidade en fomentar a confianza nas Forzas e Corpos de Seguridade celebrarase o próximo 3 de maio en Donramiro, ás 17.00 horas, no centro social.

O ciclo de charlas continuará en próximos venres do seguinte xeito: Goiás (10 de maio, 17.00 horas, centro social); Lalín (16 de maio, 17.00 horas, Museo); Cercio (24 de maio, 16.30 horas, pavillón), á que se suma a parroquia de Moneixas (31 de maio, 17.00 horas, centro social).