Ribadumia premiará aos tres mellores deseños das camisetas da Festa do Viño Tinto

A programación da XLI Festa do Viño Tinto do Salnés, que terá lugar entre o 31 de maio e o 2 de xuño,volverá a incluír o concurso de camisetas.  Repartiranse 350 euros entre os tres mellores deseños, nos que se valorará tanto a orixinalidade do debuxo coma da mensaxe. O primeiro premio é de 200 euros; o segundo, 100 euros; e o terceiro, 50 euros. Para participar, cada peña deberá presentar a súa camiseta na Casa do Concello ata o luns 24 de maio. O nome dos gañadores darase a coñecer o domingo 2 de xuño na praza do Concello.

Coa presentación da camiseta, deberase entregar nun sobre pechado os seguintes datos: nome da peña, nome dos seus integrantes, teléfono de contacto e lema da camiseta. As peñas deberán estar compostas por un mínimo de cinco membros e poderase presentar como máximo un deseño.

II Concurso de comic e historieta

Para os mais pequenos o Concello de Ribadumia convoca o segundo concurso escolar de comic e historietas Festa do Viño Tinto 2013, destinado ao alumnado de entre 5 e 12 anos da localidade. O premio será unha fin de semana en Madrid, visitando o parque Warner e o Zoolóxico. O obxectivo desta actividade é implicar aos máis pequenos na celebración da festa de Barrantes,

O comic debe tratar sobre o tinto de Barrantes, ben sexa a través da vendima, da elaboración do viño, a festa… Os traballos –as historias, debuxos e personaxes- deberán ser inéditos. Non hai límite de viñetas. A técnica será libre, en color ou branco e negro. Deberán escribirse en galego. A presentación realizarase en cartulinas DIN A4.

Os traballos non deberán identificarse, e presentaranse en sobre pechado, indicando no exterior Concurso de Comic Festa do Tinto 2013. No interior do sobre introducirase outro pechado co nome do alumno, do colexio, o curso e os datos de contacto. Os traballos entregaranse no propio centro escolar, e o persoal municipal designado pasará a recollelos o 24 de maio de 2013 ás 13.30 horas. O xurado valorará a orixinalidade e o grao de calidade dos traballos, e o seu resultado farase público o domingo 2 de xuño durante, ás 19.30 horas na Praza do Concello. O concurso é presencial, polo que é preciso que a persoa gañadora estea presente no momento do fallo do concurso e entrega de premios. Todos os traballos formarán parte dunha exposición durante os actos da Festa do Viño Tinto do Salnés.