“Presume de praceiro/a” reparte 150 euros en vales a clientela do mercado de Carballo

Instante do sorteo

O Mercado Municipal vén de acoller o primeiro dos dous sorteos que se levarán a cabo dentro da campaña “Presume de praceiro/a” posta en marcha pola Dirección Xeral de Comercio da Consellería de Economía e Industria en preto dun centenar de prazas de abastos de toda Galicia. Participaron na rifa aqueles clientes e clientas do mercado municipal que nos últimos días mercaron nos postos da praza e depositaron as súas papeletas nunhas urnas destinadas a tal fin incluíndo, ademais dos seus datos persoais, o posto do mercado do seu praceiro/a favorito. No sorteo estiveron presentes o Alcalde de Carballo, Evencio Ferrero; a Concelleira de Feiras e Mercados, Milagros Lantes; unha representante da Dirección Xeral de Comercio; e o dono de Carnicería Santiago, elixido como “mellor praceiro” polos clientes do mercado na anterior campaña e encargado de ser a “man inocente” que seleccionou as papeletas premiadas. Finalmente, resultaron elixidos 3 gañadores: 1º Premio, vale de 75 euros: Herminia Varela Cures; 2º Premio, vale de 50 euros: Mari Luz González Rama; 3º Premio, vale de 25 euros: Manuel Varela Díaz. Os cheques serán cambiables unicamente no propio mercado en forma de desconto nas próximas compras a través de vales por un importe de 5 euros. A validez dos cupóns remata o 31 de maio de 2013.

Por último, hai que subliñar que os interesados e interesadas aínda poden participar nesta iniciativa a través dun segundo sorteo que se desenvolverá o día 3 maio. Para iso, os veciños e veciñas tan só teñen que mercar no mercado municipal e depositar as papeletas na urna que seguirá colocada no recinto durante os próximos días. Ao remate da campaña, ademais de repartirse outros 150 euros en vales, contabilizaranse as papeletas e elixirase de novo ao praceiro ou praceira favorito/a dos clientes da praza carballesa. Nas edicións anteriores teñen sido dous carniceiros: Santiago de Carnicería Santiago (2011) e Jesús Manuel Costa, de Carnicería Costa (2010). O obxectivo desta campaña é incentivar o consumo de produtos perecedoiros frescos e resaltar os valores de compra nos mercados, así como a posta en valor dos profesionais que traballan cada día neles. Os interesados e interesadas en obter máis información poden facelo na web da Dirección Xeral de Comercio dispoñible nesta mesma nova.