Pontevedra celebra o Día Internacional do Pobo Xitano

A Concellaría de Benestar Social e a Fundación Secretariado Xitano celebran mañá, 8 de abril, o Día Internacional do Pobo Xitano 2013 que reclama a cidadanía dos xitanos tanto estatais como cidadáns de pleno dereito da Unión Europea.

Esta data lembra o congreso xitano celebrado o mesmo día de 1971 en Londres no que se instituíu a bandeira e o himno xitanos. A designación como Día Internacional do Pobo Xitano tivo lugar en outro congreso internacional celebrado en Varsovia en 1990.

Polo tanto, para celebrar e lembrar os obxectivos desta data, a Fundación Secretariado Xitano de Pontevedra organiza diversas actividades na xornada de mañá:

– Partido intercultural de fútbol-sala no pavillón anexo á E.E.I. Fina Casalderrey, que se disputará o luns 8 ás 18h, entre usuarios e técnicos da Casa Azul e da Fundación Secretariado Xitano.

– Exposición “Mulleres xitanas participando” na Casa Azul.

– Actividades de sensibilización en varios centros educativos.

– Exposición “Culturas para compartir” no IES Torrente Ballester de Pontevedra.