O Proxecto Terra contribúe na visión dos escolares sobre a arquitectura de Galicia

Esta mañá deu comezo o proxecto de visitas guiadas “Proxecto Terra, arquitectura e cidade”, organizado pola Concellería de Educación en colaboración co Colexio de Arquitectos de Galicia. 47 alumnos de 3º e 4º de ESO do IES Blanco Amor percorren durante o día de hoxe Allariz, achegándose aos espazos históricos e contemporáneos máis significativos.

O proxecto está especialmente dirixido ás etapas de Educación Secundaria Obrigatoria co fin de contribuír a mellorar o coñecemento que os escolares teñen sobre a arquitectura e a identidade territorial de Galicia. A iniciativa achega materiais específicos que completan os que están en disposición do alumnado e profesorado, xunto a actividades complementarias que contribúen a acadar os obxectivos sobre arquitectura e territorio contemplados na ESO.

Dentro dos obxectivos contemplados no programa, atópase intervir nos niveis de formación obrigatorios para presentar os problemas básicos da ocupación do territorio e a arquitectura, contribuír a superar a visión da arquitectura como un estudo das formas arquitectónicas e a arquitectura histórica, e colaborar na posta en valor do patrimonio construído herdado, entendéndoo como resultado dun continuo histórico que une pasado, presente e futuro.

Esta mañá, ademáis dos alumnos do IES Blanco Amor que visitan Allariz, outros 35 alumnos do IES Xulio Prieto Nespereira visitan Pontevedra. A edición deste ano inclúe a visita a oito cidades galegas: Ourense, A Coruña, Lugo, Pontevedra, Santiago, Vigo, Ferrol e Allariz.