O proxecto de lecto-escritura para adultos de Ares comezará o vindeiro día 30

O proxecto de lecto-escritura promovido pola Concellaría de Cultura de Ares para adultos comezará o vindeiro martes, día 30, tal e como informou o titular desta área, o socialista Eugenio Fernández Lago. “Eu leo, ti escribes, el conta” é o título desta actividade, que se desenvolverá a partires de agora todos os martes na biblioteca municipal entre as 10.00 e as 11.30 horas.

Trátase dunha iniciativa de balde pensada para usuarios e usuarias de máis de 50 anos que desexen repasar actividades de lectura e escritura.

Malia que xa hai un grupo formado, as persoas que queiran participar neste obradoiro aínda están a tempo de facelo ou de recabar máis información ao respecto, dirixíndose para calquera destes trámites á biblioteca municipal, ubicada na Alianza Aresana, ou chamando ao número de teléfono 981 448 057.