O Goberno local informa de cambios provisionais no tráfico durante os próximos días

O Concello, a través da Concellaría de Tráfico, Mobilidade e Uso e Utilización do Dominio Público, informa de que será preciso realizar modificacións na circulación dentro da zona urbana durante os próximos días.

–  Os traballos de canalización na rede de Gas Galicia na rúa Maestranza obrigan a ocupar o carril de circulación entre os números 24 e 28, desviándose o tráfico a través de sinais. As obras empezarán mañá martes e terán unha duración estimada ata o próximo venres, día 19.

– A chegada das vigas para o viaduto da obra de construción da Terceira Rolda fan necesario realizar cortes de tráfico intermitentes na avenida García Sabell-Carretera de Pocomaco -cunha duración aproximada de dous minutos- e na CP-512 (Ou Birloque) -cunha duración de dez minutos-. En concreto, serán 12 cortes: tres cortes na noite de mañá martes ao mércores día 17, outros tres na noite do mércores ao xoves 18 de abril, e tres máis durante o día tanto o xoves coma o venres. O horario dos cortes de tráfico será de 10.00 a 13.30 horas e de 16.00 a 18.30 horas polo día e de 21.00 a 05.30 horas pola noite. O departamento municipal de Mobilidade destaca que en todo momento haberá sinais para desviar o tráfico e informar os condutores.

– Debido a unha manifestación convocada para mañá martes, entre as 20.00 e as 22.00 horas, produciranse incidencias no tráfico polas rúas polas que discorra a devandita mobilización. O itinerario da manifestación será o seguinte: saída de Juan Flórez (á altura dos números 80 e 82), Marcial do Adaíl, Liñares Rivas, praza de Ourense, Sánchez Bregua, praza de Mina, Juana de Vega, praza de Pontevedra e, de novo, ata Juan Flórez, números 80-82. A Concellaría de Tráfico e Mobilidade recomenda evitar a circulación por esta zona durante o horario da mobilización.

– Con motivo dos traballos de canalización da rede de Unión Fenosa no ramal de suba da rolda de Camilo José Cela á avenida de Monelos, quedará afectado un carril da circulación na rotonda, manténdose libre para o tráfico o outro carril. Os traballos comezarán o mércores, 17 de abril, e durarán aproximadamente ata o día 24. O corte de tráfico será as 24 horas do día.

– Os traballos de reparación de rede de sumidoiros á altura do número 24 da rúa Curros Enríquez obrigan a ocupar un carril de circulación, sendo o tránsito dos vehículos desviado pola zona de estacionamento -primeiro, pola marxe esquerda e, despois, pola marxe dereita da calzada-. En todo momento se garantirá a anchura suficiente para a circulación. As obras realizaranse entre as 09.00 horas do mércores e as 18.00 horas do venres 19 de abril.

– As obras de reparación de rede de sumidoiros previstas para o sábado, 20 de abril, en dúas zonas da cidade tamén obrigarán a modificar o tráfico:

– De 08.00 a 10.30 horas, cortarase un carril á altura do número 68 de Fernández Latorre -esquina Doutor Enrique Hervada-, desviándose a circulación polos outros dous carrís.

– De 11.00 a 13.30 horas, cortarase un carril xunto ao número 37 da rúa Federico Tapia -fronte á saída do aparcadoiro da praza de Vigo-. Ocuparase un carril e a zona de estacionamento, deixando libre outro carril e a entrada e saída do párking.