O consorcio creará un servizo de mediación para apoiar aos veciños en risco de desafiuzamento
As concelleiras de Servizos Sociais dos concellos integrantes do Consorcio As Mariñas mantiveron unha reunión co fin de estudar a problemática creada nos seus municipios por mor dos desafiuzamentos, consecuencia do actual contexto socioeconómico e do desemprego. As conclusións foron claras. É urxente e prioritario crear medidas de apoio específicas para as persoas que se poidan atopar nesta situación. Nesta liña acordouse traballar en dous planos, un a nivel operativo e outro a nivel consultivo.
A nivel operativo vaise crear un servizo de mediación que apoiará directamente a aquelas persoas que se atopen en risco de desafiuzamento ou se atopen con problemas para asumir os pagos dos alugueres ou das hipotecas. Este servizo, terá como obxectivo asesorar e realizar un acompañamento cercano a todas as persoas que se atopen nesta situación, estudando de forma personalizada cada caso e incluso acompañando ás negociacións ás entidades bancarias, no caso de que sexa necesario, co fin de atopar fórmulas e solucións beneficiosas para todos.
Este servizo de mediación estará integrado no servizo de asesoría xurídica social especializada que xa existe no Plan Coordinador de Sevizos Sociais do Consorcio As Mariñas, e traballará en colaboración co persoal dos Servizos Sociais de cada Concello, podendo buscar asesoramento de entidades expertas nesta materia.
Por outra banda considérase necesario facer un seguimento e ter un coñecemento global da problemática e das súas posibles solucións. Con este fin vaise convocar unha comisión a nivel Consorcio, da que formarán parte todos os Concellos que o integran, unha persoa que represente ao novo servizo de mediación e a representantes de entidades relacionadas coa problemática . O fin é buscar solucións ao grave problema que están a sufrir moitas familias e propoñer medidas que se poidan levar a cabo dende as distintas administracións.
O respaldo a estas medidas foi unánime por parte de todos os Concellos, acordando a posta en marcha de inmediato de estas dúas medidas para tentar poñer freo á dramática situación que están a vivir moitas persoas pola perda da súa vivenda habitual.