O Concello de Vilagarcía inicia unha campaña de repintado de pasos de peóns

O descanso que veñen de dar as insistentes chuvias rexistradas nos últimos meses permitiu que o Concello puxera en marcha hoxe mesmo a campaña primaveral de repintado da sinalización horizontal viaria, prestando especial atención aos pasos de peóns das principais vías do municipio. A concelleira de Obras e Servizos, Ana Granja, e o edil de Tráfico, Benito Pérez Dorgambide, xunto aos seus respectivos responsables de servizo coordinaron esta mañá o plan de traballo a levar a cabo nos vindeiros días.

Os traballos comezarán esta mesma tarde, co repintado dos pasos de peóns da zona de Ravella, Xoán XXIII e Juan Carlos I. As labores de pintado continuarán mañá pola rúa Conde Vallellano e se estenderán de seguido polas demais rúas do centro da cidade. A previsión é que os traballos segan desenvolvéndose durante a vindeira semana, sempre que as condicións meteorolóxicas o permitan, xa que chovendo ou co firme mollado, non é posible pintar.

O repintado dos pasos de peóns tamén se levará a cabo na Avenida Rosalía de Castro. Esta é unha das travesías do municipio que rexistra unha maior densidade de tráfico e tamén de peóns, debido á presión urbanística e a elevada densidade poboacional que ten en todo o seu percorrido, o que fai preciso mellorar a seguridade viaria remarcando os pasos de peóns para unha mellor visibilidade dos mesmos. Non obstante, para interferir o mínimo posible na circulación, os traballos realizaranse o sábado pola tarde, momento no que o tráfico de vehículos se reduce considerablemente respecto aos días laborables e mesmo durante o sábado pola mañá.

Por outro lado, persoal do departamento de Obras tamén se dedicou durante o día de hoxe a labores de bacheo. O bo do tempo das últimas xornadas secou o asfalto e permitiu iniciar estas labores que continuarán mañá. As actuacións lévanse a cabo en estadas de competencia municipal e naquelas zonas onde se detectou maior necesidade. Un dos puntos bacheados hoxe foi unha focha que existía ao remate da Rúa López Ballesteros, no acceso ao barrio da Torre.