O Concello de San Sadurniño consolídase como exemplo na reciclaxe de vidro

Igual que noutros municipios, no de San Sadurniño hai un sistema de recollida selectiva de residuos que inclúe os envases e botellas de vidro. En 2012 recolléronse 53 toneladas destes materiais, un 20% máis ca no ano anterior. Este resultado sitúa o noso concello por riba da media galega.

Os colectores verdes do vidro están repartidos por todo o municipio e o seu número foi incrementándose de maneira constante nos últimos anos. Neste momento hai 36 iglús colocados en puntos estratéxicos para que a todos e todas nos quede un o máis preto posible tendo en conta que San Sadurniño ten unha poboación moi dispersa.

A dispersión da poboación e o grande territorio que cómpre cubrir poderían facernos supoñer que os resultados referidos á recollida de vidro non fosen nada do outro mundo. Porén, segundo Ecovidrio -a entidade encargada do seu tratamento- a realidade é ben distinta. San Sadurniño achegou á reciclaxe de vidro un total de 53 toneladas en 2012, 9 máis que hai dous anos. En termos porcentuais esta cifra supón un crecemento de 20 puntos con respecto ao 2011.

Se se comparan os datos de recollida e posterior reciclaxe cos de poboación obtemos que se trataron debidamente 17,40 quilos por habitante, tres quilos máis que a media da provincia e case catro con respecto á media galega (13,2 Kgs/H).

A estatística reflicte, polo tanto, que en San Sadurniño medra a concienciación e o compromiso veciñal co ambiente a través da correcta selección nas casas e do posterior esforzo para depositar botellas e frascos no iglú. Un compromiso refrendado recentemente por Ecovidrio nunha carta remitida ao Concello a xeito de felicitación polos resultados obtidos.