O Concello da Coruña inviste 250.000 euros na modernización da rúa Cuba

O tenente de alcalde de Medio, Territorio e Infraestruturas, Martín Fernández Prado, anunciou esta mañá que o Concello da Coruña sacou a concurso a reforma da rúa Cuba, no tramo comprendido entre as interseccións con Entrepeñas e Bellavista, co obxectivo de dar o máximo protagonismo ao peón. O novo proxecto municipal no Agra del Orzán enmárcase dentro do programa europeo Urbana C e dentro do compromiso do Goberno local de modernización dos espazos públicos da cidade para mellorar a calidade de vida e a accesibilidade dos veciños.

O Goberno local licita as obras, cofinanciadas a través fondos europeos, cun prazo de execución máximo de catro meses e un presuposto de 250.080,95 euros. O proxecto definido pola Concellaría de Infraestruturas que dirixe Martín Fernández Prado permitirá modernizar este tramo da rúa Cuba. Na actualidade, trátase dun vial con beirarrúas moi estreitas -de 0,5 metros a ambos os dous lados-, aparcadoiro en liña na marxe dereita e calzada de sentido único cun carril de circulación de 3,30 metros. A reforma xerará espazo e calidade de vida para o peón.

A reforma programada supón unha transformación integral da rúa Cuba, que se converterá nunha vía de plataforma única na que non existen beirarrúas propiamente ditas, xa que o espazo para os viandantes se poderá estender a todo o viario. O proxecto inclúe unha zona libre para o tránsito de vehículos de subministración, recollida de lixos ou de emerxencias e accesos a garaxes, cunha anchura que oscila entre os 2,5 e os 3 metros.

Unha vez procédase á demolición de todo o pavimento actual (beirarrúas e calzada), co posterior traslado dos entullos a un vertedoiro autorizado e o mantemento das infraestruturas de servizos existentes, pavimentarase a rúa con formigón pulido. Ademais, instalarase unha rede de sumidoiros para a recollida de augas pluviais; un novo colector de PVC para a recollida de augas fecais; e mobiliario urbano (fontes de beber, papeleiras e bancos). O proxecto axústase á lexislación vixente en materia de accesibilidade.