Nigrán celebra os Días Europeos da Artesanía cunha exposición de produtos artesanais

O Salón de Actos municipal albergará o próximo fin de semana unha exposición de artesanía, unha actividade que se celebra no contexto dos Días Europeos de Artesanía. Esta iniciativa, organizada pola Asociación de Artesáns “A Man do Val”, en colaboración co Concello de Nigrán e a Fundación Centro Galego para a Artesanía e ou Deseño, permanecerá aberta entre o venres 5 e o domingo 7, en horario de 12.00 a 14.00 e de 18.00 a 20.00 horas.

A mostra congregará por primeira vez en Nigrán a máis dunha trintena de artesáns de até 16 campos diferentes, como calceta e ganchillo, canteiros, olaría, cerámica, cestaría, coiro, escultura, metal, ourivaría, palilleras, pintura, talla de madeira, teares, tecido de vimbia, torneado de madeira e traxes tradicionais.

A exposición permitirá achegar á sociedade actual a historia e tradición que traen consigo os oficios artesáns. Pola súa banda, os asistentes poderán introducirse de forma gratuíta no mundo da artesanía, coñecer  a metodoloxía de traballo dos artesáns, as súas creacións e os seus produtos. “Fomentar este tipo de actividades é clave, non só polo seu potencial turístico senón tamén, e sobre todo, pola excelencia e incrible calidade do mesmo”, sinala o rexedor municipal, Alberto Valverde.

Segunda edición

Este é o segundo ano consecutivo que se celebra os “Días europeos da artesanía”, un evento promovido polo Ministerio de Industria, Enerxía e Turismo (MINETUR) a través da Fundación Española para a Innovación da Artesanía (Fundesarte), baixo o que se acollen unha serie de actividades relacionadas co sector artesán como charlas, coloquios, exposicións, talleres, seminarios, mostras, feiras, etc.

O obxectivo desta actividade é achegar ao público o mundo do patrimonio e da creación, mediante unha oferta de eventos para todos os públicos en torno ao sector da artesanía.

Arte e oficio

Ceramistas, lutieres, vidreiros, ferreiros, restauradores, etc., todos  eles compartirán os seus segredos con todos nós. Abrirán as portas dos seus talleres para descubrir ao público a súa contorna de traballo e os misterios dos seus oficios. As persoas poderán ver de preto como os grandes creadores transforman a materia prima en pezas excepcionais.

Os centros de formación abrirán as súas sedes para que os mozos interesados en aprender un oficio artesán poidan informarse sobre os cursos que se imparten, os diplomas que se obteñen, as saídas profesionais, etc. Unha oportunidade para todos aqueles que aínda non atopasen a súa vocación.

Algúns organizadores ofrecen tamén actividades lúdicas para achegar o sector artesán aos máis pequenos, a través de talleres para aprender xogando con materiais e técnicas artesás.

Orixes

Os Días da Artesanía teñen a súa orixe en Lles Journées deas Métiers d?Art que se celebran en Francia desde o ano 2002 e que no 2013 celebran a súa oitava edición e que xunto coa Fundación Española para a Innovación da Artesanía (Fundesarte), traballan para darlle a este evento unha dimensión europea que se consolide como unha festa das artes e oficios, sumando cada ano máis países a esta singular iniciativa. En 2013 os países participantes son España, Bélxica, Francia, Hungría, Italia, Letonia e Suíza.