Negreira aposta por afianzar a telemercadotecnia na cidade e manter “a chama” do emprego industrial

O Alcalde da Coruña, Carlos Negreira, apostou, esta mañá, por afianzar a actividade da telemercadotecnia na cidade e insistiu en que se seguirá loitando para afianzar o emprego industrial, en referencia ao futuro da Fábrica de Armas.

O rexedor explicou que manter os postos de traballo en Atento é importante para unha cidade na que o sector da mercadotecnia e da telemercadotecnia “está ben posicionado”. Neste sentido reiterou o seu apoio aos traballadores da empresa e informou de que hai dous días se puxo en contacto con Telefónica para poñer “criterio e sentido común” ante a decisión adoptada pola compañía na cidade: “Agora parece que está en vías de solución e me alegro de que se afiance esta actividade na cidade”.

Tamén se referiu ao futuro da Fábrica de Armas e insistiu en que o Goberno local seguirá loitando por “afianzar tamén o emprego industrial”. Negreira explicou que entende a opción tomada polos traballadores que se acolleron ao ERE de Xeneral Dynamics xa que é unha decisión que pertence “á esfera individual” e lanzou unha mensaxe de ánimo aos 70 empregados que continúan a súa actividade: “Imos manter a chama do emprego industrial porque é necesario e posible”.

PEMEX

Con respecto á viaxe do presidente da Xunta, Alberto Núñez Feijóo, a México, o alcalde valorou como positivos, para o conxunto de Galicia, os avances anunciados: “Non só para os estaleiros de Ferrol e Vigo, senón tamén para a cidade e para posibles estaleiros privados que traballan con embarcacións máis pequenas”, destacou e engadiu: “Tamén se deu unha mensaxe positiva de cara a que se estableza a base loxística de Pemex en Europa en Punta Langosteira”.

Carlos Negreira expresou a súa esperanza de que o proxecto se siga desenvolvendo e subliñou que se están a cumprir todos os trámites necesarios.