Mariñas-Betanzos recibiu en tres anos 2,5 millóns de euros do LEADER

O Grupo de Desenvolvemento Rural “Mariñas – Betanzos”  actúa como entidade colaboradora na xestión do Programa LEADER 2007-2013, iniciativa dotada con fondos europeos para promover a creación de empresas e a xeración de emprego.

Nos últimos tres anos, o GDR que preside José Antonio Santiso aprobou un total de 38 proxectos, que supuxeron una unha inxección de fondos na comarca de A Coruña e Betanzos de 8.406.932,64  euros, dos que 2.592.940,87 euros corresponden a fondos públicos.

En concreto, Mariñas – Betanzos deu validou, dos proxectos que tiñan informe favorable da Axencia Galega de Desenvolvemento Rural (AGADER), no ano 2010 13 proxectos, no ano 2011 16 proxectos, e no ano 2012 9 proxectos. Este financiamento procede do Fondo Europeo Agrícola de Desenvolvemento Rural (FEADER).

Coa axuda do Programa LEADER dende o inicio do programa, constituíronse novas empresas de diferente índole no territorio de “Mariñas –  Betanzos” (servizos turísticos, expenderías de leite, explotacións agrarias, servizos non existentes nos núcleos de poboación como papelerías, perruquerías…). A creación de emprego prevista coa posta en marcha destes investimentos é de  28,82 postos de traballo, ademais do mantemento de 357,29 empregos.

Agora ábrese a posibilidade de aspirar a fondos da anualidade 2013. O fin do período, xa aberto, para presentar a solicitude finaliza o vindeiro 1 de setembro. Santiso anima a todos os emprendedores e empresarios do territorio, con algunha idea de negocio, a que valoren optar a ser beneficiarios do LEADER.

“Os servizos técnicos do GDR están a disposición de calquera empresario que queira recibir asesoramento e información de cómo funciona o LEADER”, apunta. Os interesados poden acudir á sede do Grupo, sita en Abegondo, xunto ao Concello. Recibirán todos os detalles sobre os requisitos e procedemento destas axudas.

O ámbito de actuación do LEADER abarca os concellos de Abegondo, Aranga, Arteixo, Betanzos, Bergondo, Cambre, Carral, Cesuras, Coirós, Culleredo, Irixoa, Miño, Paderne,  Oleiros, Oza dos Ríos e Sada.