Exposición sobre o cambio climático en Nigrán

A exposición “O noso mundo, ou noso futuro, a nosa opción, abrirá as súas portas mañá martes 16 de abril, ás 18.00 horas, e permanecerá aberta ata o próximo domingo 28, en horario de 18.00 a 20.00 horas. Esta iniciativa, posta en marcha pola consellería de Medio, Territorio e Infraestruturas en colaboración co Concello de Nigrán, persegue concienciar á cidadanía sobre os efectos do cambio climático e fomentar a súa participación activa para detelo.

Entre os principais obxectivos da campaña destacan favorecer a implicación da cidadanía na loita contra o cambio climático, a través da información, o autoconvencemento e a sensibilización, así como promover un cambio de actitudes, hábitos e comportamentos individuais que deriven nunha mitigación do cambio climático no ámbito particular, revalorizando as repercusións de todas e cada unha das accións, a título individual ou colectivo. En definitiva, “sensibilizar á sociedade no seu conxunto de que todos e cada un de nós temos un papel fundamental no efecto multiplicador da difusión duns valores e actitudes a través dos nosos ámbitos máis próximos”, sinala o rexedor municipal, Alberto Valverde.

Contidos

A exposición está composta por paneis informativos con diversas mensaxes e contidos informativos e sensibilizadores respecto ao fenómeno do cambio climático; a proxección do documental “O cambio climático, o reto do século XXI”, que aborda os efectos actuais e previstos do cambio climático, coa opinión de destacados expertos; así como unha serie de módulos que mostran con exemplos prácticos e de forma gráfica a achega real de cada individuo ao cambio climático se se adoptan medidas a favor deste.