Conclúe o taller de curtametraxes en galego coa participación de máis de 100 escolares

O Concello da Coruña, a través da Concellaría de Educación, fixo balance do Obradoiro de iniciación á curtametraxe en galego 2012/2013, que se enmarca dentro do programa educativo municipal Coruña Educa.

En concreto, participaron 117 escolares pertencentes a 9 centros de Educación Infantil e Primaria da cidade que demostraron o seu interese e capacidade creativa por medio do cine. En total rodáronse 9 curtametraxes en galego. Ademais, os 5 primeiros, gravados durante o primeiro trimestre do presente curso escolar, participaron no certame de curtos CinEOI Curtas Coruña, organizado pola Escola Oficial de Idiomas os días 8 e 9 de abril. Trátanse dos traballos O encontro, do Sal Lence; Nin para ti nin para min, do concepción Areal; Apocalipse, do San Francisco Javier; Desexo, do Curros Enríquez; e Ameaza del Sagrada Familia, que finalmente foi o curto gañador. Este e os outros catro traballos xa poden verse na Canle Youtube da páxina web da Concellaría de Educación.
Os outros 4 curtos, cuxa rodaxe está a finalizar estes días nos centros Manuel Murguía, Sanjurjo de Carricate, Alborada e Montel Touzet, participarán na próxima edición de CinEOI, xunto cos curtos rodados durante o primeiro trimestre do curso 2013/2014.

Este programa, dirixido a escolares de 5º e 6º de Primaria, ten como obxectivos aprender a redactar un guión e rodar un curto utilizando como lingua vehicular o galego. Desta forma poténciase a competencia oral e escrita nesta lingua así como a capacidade creativa por medio das artes escénicas.