Concesión das estanzas de tempo libre para mulleres soas con responsabilidades familiares non compartidas

Orde do 29 de abril de 2013 pola que se regulan as bases para a concesión das estanzas de tempo libre para mulleres soas con responsabilidades familiares non compartidas.

Este programa de estanzas de tempo libre está dirixido a mulleres soas que teñen o seu cargo en exclusiva aos seus fillos e fillas e/ou menores en acollida, en moitos casos mulleres que son vítimas da violencia de xénero. A súa finalidade é facilitarlles o desfrute dun tempo desligado da súa situación habitual e no cal poidan intercambiar experiencias a través da convivencia nun espazo de ocio.

O prazo para a presentación de solicitudes será dun mes contado a partir do día seguinte á publicación desta orde no Diario Oficial de Galicia (30 de abril). Entenderase como último día do prazo o correspondente ao mesmo ordinal do día da súa publicación. Se o último día do prazo fose inhábil, entenderase prorrogado ao primeiro día hábil seguinte e, se no mes de vencemento non houbese día equivalente ao inicial do cómputo, entenderase que o prazo expira o último día do mes.

Todas as interesadas poderán informarse nas dependencias da concellaría de Igualdade e Benestar Social, situadas na rúa Faustino Santalices, de luns a venres en horario de mañá.