Carral ultima a súa XIV Exhibición Municipal de Patinaxe Artística

O pavillón de “O Espiño” acollerá o sábado 20 de abril, unha nova edición da Exhibición Municipal de Patinaxe Artística. Este acto, organizado polo Concello de Carral e o club de patinaxe “Alquimia”, dará comezo ás 17.00 h e rematará arredor das 19.30 h.

Nesta xa clásica cita deportiva, está prevista a presenza de 7 clubs, colexios e escolas deportivas municipais (Ordes, AD Liceo, Campomaior, Sigrás, Brexo Lema, Alquimia e Carral), que reunirán uns 190 patinadores de todas as idades. Cabe destacar, por parte do club Alquimia, a presenza da parella de danza, formada por Alberto Artigas e por Raquel Rodríguez (Campións galegos en 2011 e 2012, terceiros no campionato de España no 2011 e actuais subcampions no 2012). Tamén do Alquimia, estará presente Víctor Abad, (subcampión galego 2012) e por parte do AD Liceo contaremos coa parella de danza composta por Irene Fernández e David Salido (Campións galegos e subcampions de España no 2012). Todos estes deportistas de talle internacional farán unha exhibición da súa mestría no deporte do patín, para motivar e alentar os mozos patinadores.

Por outro lado, a concellaría está a ultimar os preparativos para a realización dos próximos eventos deportivos; A conferencia de José Antonio Saavedra, medalla de prata en tiro nos Xogos Paralímpicos de Londres 2012, o próximo 25 de abril; o Certame anual de Ximnasia Rítmica, que terá lugar o próximo 4 de maio tamén na mesma instalación e na que se espera contar coa presenza de ao redor de 150 nenas; a I Carreira Vicente Otero Valcárcel prevista para o próximo 25 de maio; e o acto de Clausura do curso 2012/2013 das Escolas Deportivas, Culturais e Educativas Municipais que terá lugar o próximo 1 de xuño.

Todas estas actividades continúan o programa de promoción e fomento do deporte que o Concello de Carral, mediante o seu departamento de deportes, está a desenvolver durante este ano 2013. Con este programa deportivo, a autoridade municipal pretende potenciar a práctica deportiva no termo municipal e en especial entre un sector da poboación tan sensible como é o infantil.