Benestar tramita a prestación autonómica de apoio ás familias con fillos menores de tres anos

A Concellaría de Benestar Social de Ortigueira comunica os veciños que xestiona dende mañá a solicitude da prestación económica que concede a Xunta de Galicia para paliar, na medida do posible, os gastos xerados nos primeiros anos de crianza dos fillos/ás máis pequenos.

Segundo se detalla dende o departamento municipal, poderán ser beneficiarios desta axuda todos os veciños que teñan o seu cargo menores nacidos entre o 2 xaneiro do 2010 e o 1 de xaneiro do 2013 e que, por razón dos ingresos obtidos durante o 2011, nin eles nin ningún dos membros da unidade familiar estivesen obrigados a presentar a declaración do IRPF correspondente a ese período.

A prestación, enmarcada dentro do impulso a unha política integral de apoio á familia, consistirá nun pagamento único de 360 euros por cada fillo menor que o solicitante teña ao seu cargo.

Os orteganos interesados en acceder a esta subvención, que será compatible con calquera outra establecida tanto polas administracións públicas ou calquera dos seus organismos, poderán presentar as súas solicitudes no Centro Social da vila ata o 11 de maio.