A Coruña informa de cambios na circulación para a execución de obras de pavimentación

A Concellaría de Tráfico, Mobilidade e Uso e Utilización do Dominio Público informa das modificacións na circulación que se terán que realizar durante os próximos días en diferentes puntos da cidade con motivo de obras de pavimentación, rede de sumidoiros e canalizacións.

–  A partir de mañá, martes 2 de abril, e ata o 3 de maio, será necesaria a ocupación do carril de circulación da marxe dereita da rúa Fonseca, así como a zona de estacionamento da mesma marxe, con motivo dos traballos de pavimentación que se executarán nesta vía. Os vehículos poderán desprazarse polo outro carril de circulación que está habilitado nesta rúa.

–  As obras de acometida de rede de sumidoiros na rúa Rey Abdullah, á altura do número 11, que se desenvolverán a partir de mañá -cunha duración estimada de catro días- obrigan a ocupar o carril de circulación e a zona de estacionamento, polo que se regulará o tráfico a través de sinais.

– O mércores e o xoves, en horario nocturno -entre as 22.00 e as 07.00 horas-, con motivo dos traballos de cableado de R na avenida de Arteixo, será necesario o corte do ramal de conexión da rolda de Nelle con esta avenida en sentido entrada á cidade, desviándose a circulación de vehículos polas rúas Río Eume e Río Miño.

–  A partir do próximo mércores, 3 de abril, e durante dúas semanas, a canalización da liña de alta tensión na estrada de Pocomaco obriga a ocupar a beiravía e o carril dereito de circulación en sentido Matogrande, no tramo comprendido entre a zona situada á altura do tren do campus universitario ata o ramal de desvío á rotonda elevada da avenida da Universidade. Garantirase o tránsito de vehículos polo outro carril de circulación.