A Coruña acolle o espectáculo “Miniaturas musicais de Granell”

Ana Fernández na presentación do evento

A tenente de alcalde de Cultura, Ana Fernández, presentou, esta mañá, Miniaturas musicais de Granell, un proxecto de colaboración entre aCentral Folque e a Fundación Granell, que se subirá ao escenario do Teatro Rosalía Castro o próximo xoves 18 de abril ás 20.30 horas: “Unha mostra máis do apoio que este Concello dá aos proxectos de creadores e artistas da terra”, asegurou a concelleira.

Tal e como explicou, Miniaturas musicais de Granell xorde como homenaxe ao polifacético artista galego e universal Eugenio Granell como conmemoración do centenario do seu nacemento durante o ano 2012: “Grazas ao traballo de aCentral Folque e a Fundación Granell poderemos descubrir a dimensión musical deste xenial artista do Surrealismo, nacido na nosa cidade, que ademais de pintor, escultor, realizador cinematográfico ou dramaturgo, era músico e compositor, sinalou Fernández e indicou que este traballo de investigación permitiu sacar á luz os apuntamentos que Granell deixou anotados no seu caderno de partituras inédito.

Miniaturas de Eugenio Granell recompón o universo musical do xenio nun total de 10 temas que xuntan a súa orixe de raíces galegas coa creatividade e as influencias do jazz do pianista cubano Alejandro Vargas: “Tras a súa presentación oficial hai uns meses na Cidade dá Cultura, este proxecto chega á nosa cidade para que todos os coruñeses poidamos gozar destas melodías coas que o proxecto inicia a súa xira por Galicia”, afirmou a concelleira.

A banda está composta por Alejandro Vargas (piano), José Manuel Díaz (contrabaixo), Lar Legido (batería) e Mónica de Nut (voz). Contarán coa colaboración de Edelmiro Fernández (gaita), Germán Díaz (zanfoña) e María José Pampano (viola).

As entradas xa está á venda a través das canles habituais a un prezo de entre 6 e 13 euros, con descontos do 20% para usuarios de carné novo, maiores de 65 anos e desempregados.