80 empresas interésanse polo mercado latinoamericano no encontro coa plataforma Pexga

Máis de 80 empresas galegas participaron durante esta semana en Santiago no punto de encontro coa plataforma da rede Pexga en Arxentina, que se desenvolveu na sede do Igape. A iniciativa permitiu facilitar o contacto directo coas empresarias e os empresarios interesados en iniciar ou consolidar os seus negocios no mercado latinoamericano.

A iniciativa permitiu á directora da Plataforma da Rede Pexga localizada en Bos Aires manter reunións individualizadas coas empresarias e cos empresarios inscritos, para atender consultas e recibir encargos, non só sobre o mercado arxentino senón tamén sobre as posibilidades das empresas para iniciar ou consolidar os seus negocios en mercados da área como Chile, Uruguai, Paraguai e Perú. Entre as empresas participantes destacaron as de sectores como actividades informáticas, fabricación de maquinaria, comercio ou construción.O interese do tecido empresarial galego polo mercado arxentino tense incrementado nos últimos anos, e así, en 2012, o número de empresas galegas que exportaron a Arxentina medrou nun 37% con respecto a 2009, ao mesmo tempo que as exportacións a ese país medraron nun 109% no mesmo período.

Ademais dos encontros individualizados, unha trintena de empresas participaron nunha mesa redonda para avaliar posibilidades de cooperación para abordar novos retos de forma agrupada ou para consolidar a súa presenza, cooperando, nos mercados de América do Sur.

A Rede Pexga, posta en marcha pola Xunta en colaboración coa Confederación de Empresarios de Galicia, facilita ás empresas galegas información especializada e asistencia directa en destino sobre as oportunidades e posibilidades de negocio que brinda cada un dos mercados nos que ten presenza. Tamén informa dos aspectos fiscais, xurídicos, laborais e financeiros a ter en conta á hora de facer negocios ou implantarse no país obxectivo.

Entre os servizos individualizados de asesoramento e apoio que as plataformas ofrecen ás empresas interesadas en reforzar a súa presenza internacional destacan a elaboración de axendas, o apoio en accións puntuais de promoción ou a posibilidade de usar as oficinas da Rede, como sede provisoria, no proceso previo á súa implantación comercial directa.