“Presume de praceiro” sortea vales de compra entre os clientes da Praza de Abastos de Ribadumia

Campaña “Presume de Praceiro”

A Praza de Abastos Municipal de Ribadumia participa desde hoxe na campaña “Presume de praceiro”, a través da que os seus clientes poderán gañar, por unha banda, vales de compra e, por outra, elixir ao mellor praceiro, en función tanto da calidade do produto que ofrece como da súa profesionalidade e do seu trato diario.

A campaña desenvolverase en dos quendas. A primeira será ata o 12 de abril e a segunda, do 13 de abril ao 3 de maio. Por cada compra que o cliente realice na praza de abastos nalgún destes períodos, recibirá un cupón para participar no sorteo de vales de compra e para votar ao seu praceiro favorito. Repartiranse premios de 75, 50 e 25 euros en bonos para consumir na propia praza, axudando a promover o consumo nas prazas de abastos. O mellor praceiro ou praceira de cada mercado sairá do reconto de todos os votos recibidos, e os elixidos serán recoñecidos e homenaxeados publicamente nun acto oficial. Os sorteos, que serán presenciais, realizaranse os días 13 de abril e 3 de maio na propia Praza de Abastos.

Esta iniciativa está destinada a promover os mercados; incentivar o consumo dos produtos frescos e destacar a súa calidade; resaltar e poñer en valor a profesionalidade dos praceiros; e implicar aos clientes no recoñecemento e valoración dos mercados. A alcaldesa de Ribadumia, Salomé Peña, acompañou ás praceiras no inicio da campaña.

A Praza de Abastos de Ribadumia conta con puntos de venda de peixería, hortalizas, froita, flores e zapateiro.