Ponte Caldelas aproba a liquidación do exercicio económico do 2012 cun remanente de 310.000 €

O Concello de Ponte Caldelas aprobou a liquidación correspondente ao exercicio económico do ano 2012, que será remitida ao Ministerio de Facenda.

De acordo cos datos, a liquidación dá resultado positivo, establecéndose un remanente de tesouraría para gastos xerais de 310.752,73 €.
Desta forma o Concello cunha parte deste remanente financiará a achega municipal correspondente ao Plan de Investimentos incluído no presuposto municipal deste ano 2013, que ascende 143.900 €, que inicialmente estaba previsto que se financiase a través dunha operación de crédito.

Así grazas ao resultado do exercicio presupostario do 2012, non é necesario acudir durante o 2013 a ningunha operación de crédito, o que na práctica supón reducir o nivel de endebedamento do Concello.

No Pleno do próximo xoves aprobarase unha modificación presupostaria para este fin, o que reduce aínda máis a porcentaxe de endebedamento do Concello, que xa estaba situado coa aprobación do presuposto nunha porcentaxe do 49% dos gastos ordinarios, cando o límite fixado polo Estado está no 75%. Agora ao financiarse este plan de investimentos co remanente, a débeda viva redúcese nese importe, situándose na porcentaxe do 44,1%.

Con estes datos o Concello cumpre o Plan Económico – Financeiro remitido no seu día ao Ministerio de Facenda, o que garante que o Concello finalizará o ano 2013 en estabilidade presupostaria, reducindo ademais a débeda viva do Concello por debaixo do 45% dos recursos ordinarios do Concello.

Perfecto Rodríguez cre que fai falta seguir executando os exercicios presupostarios co mesmo rigor para garantir unha situación económica saneada das contas públicas.