Lete anuncia actuacións para fomentar a actividade física nos máis novos

Lete na apertura do curso

A Xunta de Galicia –a través da Consellería de Cultura, Educación e Ordenación Universitaria e da Secretaría Xeral para o Deporte- está a por en marcha un programa de fomento da actividade física do ámbito educativo que ten como obxectivo fundamental incrementar a práctica deportiva entre os nosos nenos.

Con motivo da apertura do curso  Máis e Mellor Actividade Física” que se desenvolve hoxe en Santiago, José Ramón Lete Lasa lembrou que  ‘Galicia Saudable’ é un programa transversal e multidisciplinar que ten como obxectivo xenérico mellorar a calidade de vida e o benestar dos galegos a través da práctica de actividade física. De xeito máis concreto, resulta prioritario poñer en práctica iniciativas específicas dirixidas aos máis novos. Nesa liña, José Ramón Lete Lasa deu conta das actuacións do plan ‘Galicia Saudable’ dirixidas directamente aos escolares o ‘Proxecto educativo de centro’, o ‘Máis e mellor actividade física’ e o xa consolidado programa Xogade.

O secretario xeral para o Deporte explicou que ‘Máis e Mellor Actividade Física’,  ten como obxectivo incrementar nunha hora á semana a actividade física nos centros públicos de Educación Primaria a través de traballo e contidos conxuntos entre as áreas de Educación Física e Coñecemento do Medio. Este programa reforza a transversalidade e interdepartamentalidade propia do Plan Galicia Saudable.

Esta xornada formativa é a continuación do curso realizado o pasado sábado día 2 de marzo, baixo a temática do  ‘Proxecto Deportivo de Centro’ que busca a creación dunha Unidade de Promoción de Exercicio Saudable (UPE Escolar) en cada un dos institutos de educación secundaria que se inscriban no programa. Trátase ademais de que os IES actúen “como dinamizadores de actividade física saudable, aproveitando ao máximo os recursos existentes na súa zona de influencia e favorecendo o acceso dos seus escolares aos mesmos”, sinalou o secretario xeral para o Deporte. Todo isto recóllese no ámbito educativo do Plan Galicia Saudable, que Lete Lasa definiu como “a folla de ruta baseada nun instrumento de diagnóstico, planificación, desenvolvemento e e avaliación” para fomentar a oferta de actividades físicas e deportivas tanto dentro como fora do horario lectivo.

As liñas de actuación deportiva no eido educativo complétase co programa ‘Xogade’, que arrancou no curso 2009-2010 con actuacións de carácter deportivo-competitivo que abranguen actividades lúdicas e formativas. A novidade neste ano é a incorporación do ‘Móvete+’ , con actividades de índole musical e coreografía orixinal para exercer nos tempos de ocio escolar. “En definitiva trátase dunha forma máis  de promover a actividade física a través dunha acción lúdica, transversal e divertida”, subliñou o secretario xeral para o Deporte, quen destacou que “a clave do éxito” destes programas é “a involucración do corpo docente”, dos propios centros e de toda a comunidade educativa.

A día de hoxe, xa están inscritos nestes programas (incluídos no Plan PROXECTA da Consellería de de Cultura, Educación e Ordenación Universitaria) un total de 286 centros públicos de Galicia, dos cales 203 están en ‘Xogade’, 54 en ‘Máis e mellor actividade física’ e 29 no ‘Proxecto deportivo de centro’.

A xornada formativa na que hoxe participou José Ramón Lete Lasa está dirixida a mestres de Educación Física de e nela abórdanse as bases para que os centros educativos actúen como dinamizadores de actividade física e exercicio físico saudable, sacando proveito os recursos existentes no seu contorno e favorecendo o acceso por parte de toda a comunidade educativa.