Dan comenzo os obradoiros de Tempo de Lecer 2013 nas asociacións mosenses

Participantes no obradoiro

Xa comenzaron as clases dos cursos do Programa Tempo de Lecer 2013 nas asociacións adheridas a esta iniciativa do departamento municipal de Participación Cidadá. Dende a concellería de Participación Cidadá do Concello de Mos que dirixe a edil Kely Monzón investíronse 10.000 euros para poder continuar co programa Tempo de Lecer durante o ano 2013 e que os seus usuarios sigan a pagar tan só un euro por cada hora de clase.

O total de asociacións adheridas ó Programa Tempo de Lecer 2013 é de 18. Concretamente son As Pedriñas de Tameiga, Santa Eulalia de Mos, A Cividade de Louredo, a Asociación Recreativa e Cultural de Guizán, a Asociación de Mulleres Rurais Val da Louriña, a Asociación Cultural e Social de Herville, o Círculo Cultural Abrente, o Centro Recreativo e Cultural de Torroso, Santa Mariña de Dornelas, Asomamos, Ledicia de Sanguiñeda, o Grupo Folclórico Nosa Terra de Pereiras, a Asociación Veciñal Nosa Terra de Pereiras, San Rafael de Pereiras, San Martín de Tameiga, e as asociacións de veciños de Petelos, Celado e Chan do Bosque. Entre todas elas impartiranse un total de 28 cursos diferentes, hainas que realizarán un so curso de 30 horas de duración e outras levarán a cabo dous cursos de 15 horas cada un.

Monzón considera fundamental a continuidade deste programa que promove actividades de lecer nos locais de diferentes asociacións ubicadas nas dez parroquias mosenses para facilitarlles ós veciños e veciñas do municipio uns mellores e máis óptimos aproveitamento e xestión do seu tempo libre, posto que ó ser o de Mos un Concello tan disperso, iniciativas coma esta son o xeito máis eficaz de achegarlle ós seus habitantes iniciativas de ocio productivas.

Ademais, outro dos fins do programa é dar resposta á gran demanda por parte das asociacións, a maiores do xa mencionado obxectivo de conseguir unha mellora do uso e disfrute do tempo libre dos participantes, a través da aprendizaxe, do traballo en equipo é do fomento da creatividade nos diferentes campos de actuación social.

De modo que, en resumo, os fins desta nova etapa do programa Tempo de Lecer do ano 2013 son fomentar o asociacionismo na vida sociocultural e comunitaria, facilitar ás persoas de Mos a posibilidade de ocupar o seu tempo de lecer con actividades formativas adaptadas ás súas posibilidades  económicas, promover a participación social entre as persoas que máis o precisen, proporcionar alternativas de lecer no seu medio máis próximo, e fomentar o uso do tempo de lecer en equipo.

Os obradoiros realizaranse entre os meses de marzo a novembro, parándose no mes de agosto por vacacións. Este programa está dirixido a tódolos veciños e veciñas maiores de 14 anos, empadroados/as no Concello de Mos ou que sexan membros dalgunha asociación inscrita neste Concello.