Aprobado o proxecto de cubrición da bancada do campo de fútbol do SERGAS

O Goberno local aprobou o proxecto presentado polo arquitecto Jorge Barata Martínez para a cubrición da bancada do campo de fútbol de San Lázaro (SERGAS), que suporá un investimento inicial de 90.684 euros. A Concellería de Deportes considerou necesaria esta cuberta ante a cantidade de días de choiva que ten a cidade cada ano e o alto uso que ten esta instalación.

Esta intervención únese a outras que xa tivera que realizar o actual Goberno municipal para solventar as deficiencias na construción deste campo de herba artificial. Así, esta instalación non puidera abrirse ata retirarse a liña de alta tensión que a atravesaba. Ademais, resolvéranse problemas de filtracións, acondicionáranse os vestiarios e dotárase ao campo de iluminación.

Adaptación normativa

En materia de Persoal, a súa titular, Amelia González, deu conta da adaptación ao Real Decreto-lei 20/2012, de medidas para garantir a estabilidade orzamentaria e de fomento da competitividade do convenio colectivo en materias como os días de ausencia por hospitalización, intervención cirúrxica e IT derivada de embarazo, ou permisos por asuntos particulares. Así, contémplanse cuestións como o pago do 50% da retribución nos tres primeiros días de ausencias prolongadas que no xeren incapacidade temporal, o paso de 9 a 3 días de asuntos particulares ou a eliminación do punto que incrementaba o número de días de permiso dispoñibles en función da antigüidade.

Bolsas de comedor

Na reunión do Goberno local tamén se resolveron diversas incidencias relativas á xestión das bolsas de comedor escolar do curso 2012-2013. Sobre este tema, a voceira da Xunta de Goberno, María Pardo, indicou que se concederan 219 becas, das cales 195 permiten atender situacións de emerxencia social (80 euros/mes) e outras 24 son becas de conciliación (40 euros/mes).

Obras no polígono do Milladoiro

Outro dos asuntos tratados foi a autorización ao Concello de Ames para a realización de obras de reparación do firme no Polígono de Novo Milladoiro, concretamente na avenida do Muíño Vello, que se atopa no termo municipal de Santiago de Compostela.