A Escola de Música de Vilagarcía pospón ata febreiro o pago do último trimestre

Con motivo da apertura do período de reserva de praza na Escola Municipal de Música Bernardo del Río, a dirección do centro e o goberno local acordaron espaciar o último prazo de cobro das cotas de matriculación e de trimestre co obxectivo de facilitar ás familias o seu pago. A novidade refírese ao último dos tres pagos nos que se fracciona a taxa que, en lugar de pasarse no mes de novembro do curso en vigor, como aconteceu este ano, posporase ata febreiro.

Segundo acordou o goberno, os dous primeiros abonos do vindeiro curso manteranse. O primeiro recibo, correspondente ao pago da matrícula e ao primeiro trimestre de curso faranse en xuño, cando de formaliza a reserva de praza. As familias deberán abonar o segundo trimestre en setembro, cando se inicie e curso; pero o último non terán que afrontalo ata o mes de febreiro.

Con este aprazamento do último pago fraccionado, tanto a dirección da Escola de Música como o goberno local atenden unha petición trasladada por varias familias do centro co obxectivo co obxectivo de que poidan afrontar con maior comodidade o abono das cotas.