A Coruña destina 5 millóns de euros á modernización de espazos públicos

Xunta de Goberno

A Xunta de Goberno Local autorizou esta mañá a solicitude dun préstamo de 11,45 millóns de euros, recollido no presuposto municipal de 2013, para o financiamento de obras executadas por diferentes departamentos do Concello e que mellorarán a imaxe dos espazos públicos da cidade.

O Concello reforzará o seu compromiso co plan de recuperación e modernización de espazos públicos da Coruña cun investimento que supera os 4,9 millóns de euros e que se recolle neste crédito, onde destacan proxectos estratéxicos como a construción do vial subterráneo do Parrote, que permitirá liberar do centro 40.000 vehículos diarios e recuperar 52.000 metros cadrados para uso e desfrute dos cidadáns. O Concello, tal e como é habitual todos os anos e tal e como aparece recollido no presuposto vixente, solicitará este préstamo para a execución de novos investimentos, sen que este acordo implique un aumento da débeda municipal ao final do exercicio.

Estes oito proxectos do plan de recuperación e modernización de espazos públicos forman parte dun ambicioso programa de actuacións que terán continuidade nos próximos anos. Aos preto de 5 millóns de euros recollidos no préstamo para estas actuacións, súmanse outros proxectos comprometidos por este equipo de goberno para impulsar as novas tecnoloxías, a protección do patrimonio, o fomento do deporte base e a mellora da calidade de vida dos veciños a través de programas sociais:

– Achega municipal ao convenio co Ministerio de Ciencia e Innovación e Emalcsa para Smart Coruña (700.000 euros).
– Primeira fase do plan director de murallas (400.000 euros).
– Equipamento do centro Boandanza dentro do proxecto Urbana C (235.000 euros).
– Construción de dúas pistas polideportivas (270.429 euros).
– Rehabilitación da cuberta do estadio de Riazor (250.000 euros).
– Obras de reparación da estación de autobuses (287.963 euros) e do tranvía turístico (275.000 euros).

O préstamo, que conta co visto e prace da Xunta e dos servizos económicos e xurídicos municipais, terá un período de carencia de dous anos e de dez para a súa amortización. No crédito inclúese unha partida de 2.474.523 euros para resolucións e sentenzas, sobre todo por asuntos urbanísticos vinculados á xestión realizada polos gobernos socialistas durante 28 anos. Esta cantidade, que supón o 21,6% do importe final deste crédito, xa estaba prevista no presuposto municipal de 2013 e, polo tanto, se enmarca dentro dunha partida xenérica de 4,6 millóns de euros para o pagamento de indemnizacións, o que permitirá cumprir sentenzas xudiciais por erros urbanísticos cometidos polo PSOE durante a súa etapa de goberno en solitario e en coalición co BNG.

NOMEAMENTOS
A Xunta de Goberno Local, na sesión extraordinaria de hoxe, tamén aprobou o nomeamento de Francisco Javier Mato Fariña e de Pablo José Vázquez Muñiz como novos directores de Asesoría Xurídica e de Planificación e Administración Electrónica, respectivamente, substituíndo nos cargos a Alfonso García Magariños e a José Manuel Peña Penabad, os cales solicitaron o seu cesamento.

Francisco Javier Mato Fariña e Pablo José Vázquez Muñiz contan cunha ampla experiencia, posto que o primeiro xa forma parte do equipo da Asesoría Xurídica Municipal e o segundo traballou durante dez anos na empresa Oesia Networks, unha consultora multinacional especializada en tecnoloxía. O Concello agradece tanto a Alfonso García Magariños coma a José Manuel Peña Penabad o seu traballo e dedicación no desempeño das súas funcións.