Unha delegación de 12 turoperadores estadounidenses acudirá ao salón Turexpo Galicia

Bolsa de contratación en edición anterior

Unha delegación formada por 12 turoperadores estadounidense acudirá en busca de propostas turísticas e negocio á terceira edición do Salón Turístico de Galicia, Turexpo Galicia, a cal se celebrará do 22 ao 24 de febreiro no recinto Feira Internacional de Galicia. Participarán no certame a través da súa Bolsa de Contratación, na que está previsto contar cun importante número de turoperadores internacionais e tamén nacionais que se está a pechar estes días.

O grupo está composto por directores xerais, directores de incentivos, de produto e de axencia, copropietarios e axentes de reservas de maioristas procedentes dos estados de Virginia, New York, New Jersey, Connecticut, Massachusetts, California e Texas.

Os membros desta delegación, cuxa presenza é froito da colaboración da Rede Pexga (Rede de Plataformas Empresariais no Exterior de Galicia) e de Turespaña a través das súas OETs (Oficinas Españolas de Turismo), están interesados principalmente en establecer contactos na Bolsa de Contratación con turoperadores galegos, hoteis e empresas de servizos, e tamén en coñecer propostas de ocio, cultura, gastronomía, enoturismo e turismo activo. A súa presenza no salón é fundamental para os expositores, xa que buscan produtos turísticos para distintos perfiles de clientes.

Reunións axendadas

Estes turoperadores estadounidenses, ao igual que o resto de participantes na Bolsa de Contratación Turística de Turexpo Galicia 2013, contarán cunha axenda de reunións fixada con antelación en función tanto dos seus intereses como das preferencias e estratexias comerciais dos expositores presentes nesta edición do salón.

Estes encontros celebraranse durante o primeiro día e medio do salón, cando contará coa participación dos profesionais do sector.