O programa de educación ambiental para escolares ocuparase das eco-auditorías

O xoves e o venres desta semana continúan as actividades do proxecto de educación medio ambiental, deseñado pola concellería de Medio Ambiente e consensuado cos colexios, no que se recollen diferentes obradoiros a desenvolver nos centros educativos durante o presente curso escolar.

A actividade, dirixida ó alumnado de 3º e 4º de primaria, comprenderá unha parte teórica, outra práctica e outra reflexiva, sendo impartida por doce monitores de medio ambiente e un coordinador, todos eles voluntarios procedentes do campus de Lugo.

O xoves día 28 realizarase nos colexios A Gándara e CEIP Monforte de Lemos, pola mañá, e Infanta Elena, pola tarde, mentres que o venres día 1 de marzo será a quenda para Ferroviario e Fundación Torre de Lemos, pola mañá, e Escolapios, pola tarde.

A realización da eco-auditoría tén como propósito lograr que o alumnado identifique a súa “pegada ecolóxica” e da do seu centro escolar, intentando que se conciencien delo e procuren reducila.

Os obxectivos da eco-auditoría son:

– Coñecer a situación enerxética do centro docente.

– Analizar e valorar o uso que se fai da enerxía nos centros.

– Plantear posibles medidas de mellora da situación enerxética.

A actividade desenvolverase seguindo os pasos que se indican:

– Os monitores achegarán coñecementos básicos sobre aforro enerxético e sobre a “pegada ecolóxica”.

– O alumnado cubrirá uns cuestionarios onde se recollerán datos relacionados co edificio e o seu entorno: vexetación próxima ó edificio, ventás, material de construción do tellado, fontes de enerxía que utiliza o centro, iluminación, calefacción, refrixeración, etc…

– Unha vez recollidos tódolos datos do centro farase un informe diagnóstico que resuma os problemas e as posibles solucións para lograr un edificio ecoloxicamente viable.

– Elaboración dun informe final cos aspectos que se poidan mellorar e as posibles  solucións que os/as alumnos/as propoñan para diminuír a “pegada ecolóxica” do centro.

Os obxectivos  das actividades propostas pola concellería de Medio Ambiente dentro deste proxecto dirixido os/as escolares son:

 – Sensibilizar e concienciar sobre o medio ambiente

– Recoñecer as zonas naturais locais

– Desenvolver hábitos de reciclado, redución e reutilización.

– Promover valores  de respecto, coidado e protección do medio

No pasado mes de novembro realizouse a primeira destas actividades que, baixo o título de “Os tres RRR”, ocupouse da reciclaxe, a redución e a reutilización.