O Concello abre mañá o prazo para o pagamento voluntario do imposto de vehículos

O Concello da Coruña inicia, a partir de mañá venres, 1 de marzo, e ata o próximo 30 de abril, o período de pagamento voluntario do Imposto sobre Vehículos de Tracción Mecánica de 2013. Os propietarios terán a posibilidade de aboar o recibo nas dependencias da Concellaría de Facenda, na rúa da Franxa, ou en calquera das 16 entidades bancarias colaboradoras. Ademais, as persoas interesadas tamén poderán efectuar o pagamento e obter información e toda a documentación necesaria a través da páxina web municipal -www.coruna.es-.

O departamento municipal de Facenda e Administración Pública destaca que para este ano se manteñen as tarifas de 2012, dentro da política municipal de conxelación de impostos e taxas. O Concello coruñés emite este ano 123.169 recibos, cunha recadación prevista de 11.687.066,81 euros. Por categorías, destacan os turismos -cun total de 101.598 unidades, o que supón o 82,49% do parque móbil-; seguidos das motocicletas (8.349), os camións (7.181), os ciclomotores (3.587), os remolques (1.163), os tractores (1.106) e os autobuses (185).

Dende a Concellaría de Economía e Facenda informan de que un total de 17.831 vehículos reúnen as características específicas para contar con algún tipo de bonificación na factura, o que supón un incremento do 7% con respecto ao 2012, cando foron 16.663. En total, xa case representan o 14,5% do parque móbil da cidade. O Concello destaca sobre todo o notable aumento dos vehículos híbridos, posto que, fronte aos 62 que estaban rexistrados en 2011 e os 124 do ano pasado, para 2013 se contabilizaron un total de 195, é dicir, que se triplicaron en apenas dous anos. A partir de mañá e durante os meses de marzo e abril, o Goberno local ofrecerá aos propietarios dos vehículos a posibilidade de pagar os seus impostos a través de diferentes vías:

1. A Caixa Municipal, é dicir, nas oficinas da área de Facenda, na rúa da Franxa, 20-22, en horario de luns a venres (agás festivos) de 08.00 a 14.00 horas. O pagamento poderá efectuarse en metálico ou a través de cheque a nome do Concello da Coruña, conformado ou certificado pola entidade bancaria, e a través de tarxetas de débito e crédito emitidas por Novagalicia Banco.

2. En internet mediante a pasarela de pagamentos municipal: na páxina web do Concello -www.coruna.es-.

3. En bancos e caixas de aforro que colaboran coa administración municipal. En total, son 16 entidades financeiras: BBVA, Banco Caixa Geral, Banco Etcheverría, Banco Español de Crédito (Banesto), Banco Galego, Banco Pastor, Banco Popular Español, Banco Sabadell Atlántico, Banco Santander, Barclays Bank, Novagalicia Banco, Caixa de Aforros de Cataluña, Caixa España, Bankia, CaixaBank (A Caixa) e Citibank. No caso de ter o recibo domiciliado, o cargo en conta do importe realizarase o próximo 1 de abril.

Os documentos de cobramento serán enviados ao domicilio declarado por correo ordinario. En caso de non o recibir, o obrigado ao pagamento deberá comparecer nas oficinas municipais da rúa da Franxa para obter un duplicado, xa que a súa non recepción no domicilio non exonera da obriga de pagamento, nin impide a utilización da vía de constrinximento.

As persoas interesadas tamén poderán obter a documentación a través da páxina web do Concello -www.coruna.es-. Para máis información, pódese acudir ás oficinas do departamento municipal de Facenda ou chamar aos números de teléfono 010 (se a chamada se efectúa dende fóra da cidade deberase marcar o 981 18 42 78) ou ao 981 18 42 00.