Mos pon en marcha un plan de seguemento dos verquidos indebidos en contedores

Dende as concellería de Medio Ambiente e Limpeza Viaria e Parques e Xardíns, que dirixen os edís Julia Loureiro e Cándido Pérez, respectivamente, se está a levar a cabo un plan de seguemento, -respaldado e co apoio da Policía Local de Mos e do Servizo Municipal de Emerxencias-, do verquido de desperdicios nos contedores distribuídos polas distintas zonas do Concello; mediante o que se pretente detectar e controlar verquidos indebidos impoñendo incluso, se fose necesario, as pertinentes multas coercitivas.

As medidas que se están a emprender por parte da administración local respecto a este plan de seguemento dos desperdicios xerados polos mosenses, responden a un protocolo desenvolvido para evitar verquidos indebidos, impoñendo sancións a quen faga un uso erróneo dos contedores.

E é que tanto Cándido Pérez coma Loureiro, concelleira de Medio Ambiente, lembran que se están a realizar no municipio verquidos incontrolados en todo tipo de contedores, tanto nos de residuos orgánicos, coma os de vidro, papel e cartón, e plástico e envases lixeiros; nos que se está a comprobar que hai persoas que depositan sobre todo escombros de obras e residuos vexetais resultantes da limpeza de fincas, tales coma ramas, maleza, herbas, etc; ou incluso ata materiais industriais coma restos de pezas mecánicas ou aceites. E advertiron de que se emprenderán medidas a este respecto co protocolo de seguemento que está posto en marcha.

Esta mesma mañá ambos edís visitaron algúns dos puntos do municipio con máis presencia de contedores para supervisar o seu estado e comprobar que neles non houbese verquidos indebidos, e Julia Loureiro aproveitou ademais para lembrarlles ós veciños e veciñas de Mos que tamén poden reciclar o seu aceite usado en bidóns destinados a tal fin, pero recalcou que o líquido a reciclar debe de ser verquido en ditos bidóns e non deixado dentro de botellas ó carón dos mesmos, como se está rexistrando que fan moitos usuarios. En definitiva, a edil de Medio Ambiente salientou que “con todos estes xestos contribuiremos a mellorar o medio ambiente de Mos”.

Recollida de enseres

Por último Pérez e Loureiro recordaron que, mentres non estea rematado o punto limpo que se está a construir no PEMOS-Veigadaña, -remate que está previsto para a vindeira primavera-, o Concello de Mos mantén o seu servizo de recollida de apareellos tales coma electrodoméstidos ou mobles vellos. Os primeiro e terceiro martes de cada mes pasan a recoller polos contedores os enseres alí depositados previa chamada telefónica ó departamento de Medio Ambiente, teléfono 986 331 402, do veciño usuario que desexe desfacerse dalgún destes materiais. É por iso que, neste sentido, ambos concelleiros rogaron tamén hoxe que se siga dito procedemento e non se tiren os aparellos vellos das vivendas de Mos de xeito aleatorio e indiscriminado.