Mercadona investirá 4,5 millóns de euros na construción das instalacións na avenida Fraga Iribarne
Mercadona investirá 4,5 millóns de euros na construción dunha nova superficie comercial que executará na avenida Fraga Iribarne segundo o orzamento que figura no proxecto que ten previsto desenvolver a empresa.
Á marxe diso, continúa completando os trámites administrativos agora coa publicación no Boletín Provincial da Provincia do acordo da Comisión de Goberno no que se aprobou de forma inicial o Estudo de Detalle da parcela situada na avenida Fraga Iribarne tramitado por Mercadona. A partir deste momento o estudo permanecerá en exposición pública durante un prazo de 20 días.
O estudo inclúe a ordenación xeral da parcela para a construción das futuras instalacións da multinacional. Unha vez resolta a exposición pública do estudo de detalle e resoltas as alegacións, se é que as houbese, tramitaríase a licenza de obras.
Paralelamente a este proceso, a empresa presentou tamén solicitude para o derrubamento das naves existentes na parcela que nestes momentos se encontra en tramitación. A intención de Mercadona é construír novos equipamentos comerciais que alberguen o hipermercado.
O goberno local destacou a importancia da implantación de empresas como “esta multinacional” que levará consigo á creación de novos postos de traballo e tamén a potenciar comercialmente a zona onde se asentan outras importantes empresas de servizos e distribución, reforzando tamén a cidade como cabeceira comarcal. Precisamente este feito, o que Betanzos sexa cabeceira de bisbarra, o seu posicionamento territorial, foi unha das razóns que impulsado á empresa a asentarse na cidade e realizar este importante investimento.