A unidade móbil de doazón de sangue estará mañá no Milladoiro

A unidade móbil de doazón de sangue visita todos os meses o concello amiense. De feito, o vindeiro luns 28 de xaneiro o autobús desprazarase tamén ata Bertamiráns. Nesta localidade estará situado na parada de autobús da Avenida da Maía, fronte á Praza da Maía. O horario será de 9,30 a 14,30 horas e de 15,30 a 21,00 horas.

O Centro de Transfusión de Galicia, grazas o emprego das unidades móbiles intenta facilitar o solidario xesto de doar sangue a todos os cidadáns. Nesta ocasión terán a oportunidade de doar todos os veciños e veciñas do Milladoiro e de Bertamiráns que así o desexen.

Todos os días son necesarias 500 doazóns de sangue para que os centros sanitarios galegos poidan levar a cabo axeitadamente o seu labor asistencial xa que, grazas a inestimable colaboración dos doadores e doadoras galegos, todos os días poden levarse a cabo nos centros sanitarios galegos unha media de 500 intervencións cirúrxicas, atender 3.000 urxencias e realizar tres transplantes de órganos e tecidos.

O Concello de Ames é consciente da situación de necesidade en canto ao número de doazóns de sangue e atópase comprometido a facer todo o posible por aumentar as doazóns e axudar as persoas que así o precisen. Debido a iso, as localidades do Milladoiro e Bertamiráns acollerán unha vez máis a unidade móbil de doazón.

O Concello e o Centro de Transfusión de Galicia fan un chamamento á participación de todos os veciños e veciñas nas campañas de doazón. Un acto de solidariedade e compromiso social co que se poden salvar moitas vidas.