A Policía Local fai balance do pasado ano 2012

A Policía Local de Allariz presentaba a pasada semana, a través do Alcalde Francisco García, o balance das intervencións que tiveron lugar ó longo do ano 2012.

No referente a faltas e delitos, con 51, o rexedor destacaba a evolución positiva e a tendencia decrecente con respecto ó ano anterior. Destes, 12 corresponden a delitos relacionados coa seguridade viaria, de violencia de xénero, danos contra o patrimonio e maltrato animal. O Alcalde destaca o alto esclarecemento dos supostos acaecidos (un 83% dos casos foron esclarecidos). No caso de faltas leves, como furtos, aclaráronse un 46%. (18 dos 39 expedientes).

No relativo á seguridade vial, os índices de sinistralidade reducíronse en comparación ó pasado exercicio froito da intervención programada, os plans de seguridade viaria e a mellora da rede. Dos 20 accidentes acontecidos no 2012, 16 foron rexistrados con danos materiais e 4 con algún ferido leve.

Atendendo a campañas programadas pola Dirección Xeral de Tráfico a policía local de Allariz realiza controis de alcolemia, utilización do móbil e control do uso do cinto de seguridade. Os 208 controis propios, realizados directamente pola policía municipal, saldáronse con 2 denuncias.

As denuncias de tráfico veñen dadas, na súa maioría, por sancións por aparcamento indebido (392 denuncias en 2012). E das que 269, o seu cobro foi recadado en período voluntario.

Ademais a policía local de Allariz realiza, entre outras actividades, o seguimento do cumprimento das ordenanzas municipais, como a limpeza de fincas das que se derivaron 51 informes; 25 en materia de urbanismo, 15 en danos contra o patrimonio municipal e 18 sobre a exención de imposto.

O rexedor alaricano valoraba este balance de xeito positivo pola continuidade mostrada nas cifras da tendencia decrecente da sinistralidade e o importante número de esclarecemento nos casos ocorridos.

A Policía Local de Allariz continuará a súa labor no ano 2013, a través dos seus 5 axentes con servizo diario.