A Secretaría Xeral para o Deporte presenta “Galegos e Campións”

O secretario xeral para o Deporte, José Ramón Lete Lasa, sinalou que o almanaque é un reflexo dos éxitos acadados polos deportistas galegos

O secretario xeral para o Deporte, José Ramón Lete Lasa, e maila xefa de Relacións Externas da empresa Begano, a embotelladora para Galicia de Coca-Cola, presentaron hoxe o calendario 2013 “Galegos e Campións”, que reúne a campións galegos en varias disciplinas deportivas (atletismo, fútbol, vela, …).

Na súa intervención, José Ramón Lete Lasa destacou que o almanaque “ven atestado de éxitos deportivos que, desde xaneiro a decembro, teñen detrás enormes doses de esforzo, de sacrificio, de tesón e de espírito deportivo”. “Unhas cualidades –dixo- que os nosos deportistas atesouran e que ben merecen o apoio e o traballo de todos”.

O secretario xeral para o Deporte subliñou os éxitos internacionais e os triunfos olímpicos e paralímpicos acadados polos representantes galegos e “dos que todos nos sentimos orgullosos”. Así mesmo recoñeceu á empresa Begano o seu compromiso e responsabilidade social co deporte galego.

O calendario, que se repartirá este Nadal, amosa as fotos de grandes deportistas galegos de elite como Verónica Boquete, campiona de la Liga Sueca de Fútbol no 2012, Sofía Toro (ouro olímpico en Londres 2012), José Manuel Prado (olímpico en Londres 2012 de Boccia), José Cuba (campión de España de Loita libre), Guillermo Javier Rodríguez (4º nos xogos Paralímpicos en tiro con arco nos xogos paralímpicos de Londres), Juan Antonio Saavedra (prata na modalidade de Tiro Olímpico nos XXOO) entre outros.