As reivindicacións da Policía Local de Vilagarcía serán analizadas como as dos demais traballadores municipais
As reivindicacións laborais dos axentes da Policía Local serán analizadas do mesmo xeito que as dos demais traballadores municipais, é dicir, tendo en conta os distintos informes técnicos sobre a súa viabilidade e dentro dos órganos constituídos a tales efectos, é dicir, a denominada “mesa de negociación”, na que participan, ademais do propio goberno municipal, a xunta de persoal e o comité de empresa, que, cabe recordar, son os representantes dos traballadores. En consecuencia, e a xuízo do goberno local, as asembleas sectoriais non teñen sentido. Non parece que sexa o mellor xeito de abordar un asunto tan complexo e con tantas variables facendo asembleas de policías por unha banda, de operarios de Obras por outra, e así sucesivamente cos distintos departamentos e servizos.
O goberno que dirixe Alberto Varela entende que do mesmo xeito que son lexítimas as aspiracións dos traballadores en canto a súa promoción interna e de subida de salarios, tamén as administracións teñen a lexitimidade, e a obriga, de optimizar e facer un uso razoable dos recursos dos que dispoñen; recursos que, en todo caso, proceden do esforzo impositivo de todos os cidadáns, a quen os políticos pero tamén os traballadores municipais se deben. E, neste sentido, o alcalde volve a reiterar que esas reivindicacións non poden ser trasladadas á cidadanía en forma de diminución do servizo que se presta.
O executivo local aposta, polo tanto, por abordar a situación laboral de todo o cadro de persoal dende unha perspectiva global, non sectorial. E do mesmo xeito que xa convocou varias prazas para cubrir as baixas no corpo policial, tamén ten practicamente lista a licitación da RPT, cuxos traballos comezarán este mesmo ano. Con independencia disto, o goberno xa encargou á xefatura da Policía Local un informe sobre o que, ao seu parecer, debe ser o cadro de persoal ideal de axentes para unha cidade como Vilagarcía.